Dorisip naalakkersuisut nersualaarpai

Maluginiagaasa ilagaat Europamut tunngasunut ministerip qanittukkut nunatsinnut tikeraarnerani Danmarkimik EU-millu suleqateqarnerit eqqartorneqarmata. Ilanngullugu maluginiarpaa isumaginninnermut ministerip Nunatta Danmarkillu akornanni angalasut isumaginninnikkut eqqumaaffigineqarnissaannut iliuuseqarnera.

Doris Jakobsenip aamma inatsisinik atortitsinermut ministeri naammagisimaarpaa kalaallit kommunefogedit atugaat pitsanngorsaaviginiarmagit aammalu pinerluuteqarsimasunut inissiisarfimmiinissamut utaqqisunut inissiisarfissamik ammaammat. Aammattaaq ilageeqarnermut ministeri nersualaarpaa kalaallit Danmarkimi najugallit palaseqarnerat iluarsiivigimmagu.

Nersualaarneqartut ilagaat illersornissamut ministeri nunatsinni sillimaniarnermut pitsanngorsaatinik aallartitsiniarmat.

Doris Jakobsenip taakkartorpaa Siumup Socialdemokratinik suleqarluarnera. Taassuma isumalluarfigaa naalagaaffeqatigiinneq aqqutigalugu atlantikup avannaani pitsanngorsaasoqarnissaa.

- Issittumi ineriartupiloortoqarpoq. Pisuussutivut piumaneqartorujussuanngorput. Nunap pisuussutai avataaneersut piumavaat. Uagulli aamma atorusuppagut naalagaaffiup tapiissutaasa pisariaarunnissaat siunertaralugu, tamannami ajornartorsiutitaqartarmat, Doris Jakobsen oqarpoq.

Periarfissatut taakkartorpaa aatsitassat atorlugit imminut nammassinnaasumik aningaasarsiulernissaq.

- Suliffeqarferujussuit appakaaffiginiarsaraatigut. Inuiattut ataqatigiissinnaaneq Danmarkimillu suleqateqarluarnissaq pisariaqartipparput qulakkeerniarlugu nunat tamalaat isumaqatigiissutaat malillugit niuertoqarlunilu aatsitassanik qalluisoqarnissaa, Doris Jakobsen oqarpoq.

Isumatusaartumik eqqortumillu iliuuseqarnikkut pissarsiaqarluarnissaq qulakkeerneqarsinnaasoq naalaagaffiullu tapiissuteqartarnissaa pisariaqarunnaarnissaa anguneqarsuinnaasoq Doris Jakobsenip ippassaq Folketingimi ammaalluni oqallittoqarnerani taakkartorpaa.