Assi: Arctic Circle

Dorisip benzinamut kortia tigoriaannaasimasoq kukkunersiuisup isornartorsioraa

Doris J. Jensenip atuuffimmini biilianik, benzinamut akiliutaanik taassumalu isissutissartaanik atuisinnaasut arlaqarput. Tamanna Deloittep suliamik misissuineranit allagaatini, KNR-ip pissarsiarisaani allassimavoq.

Doris J. Jensenip naalakkersuisuunerminut atatillugu biiliminut, Mitsubishi Outlanderimut Namminersorlutik Oqartussanit orsiinissamut akiliutaanik atornerluisimasoq novembarip 24-at, 2017 politiinut unnerluutigineqarpoq.

Deloittep suliamik misissuinera naapertorlugu unnerluutigineqartup angallat ikinnerpaamik 6.855 koruuninut 2017-imi orsersimavaa. Orsiinermili atorneqartoq suli annerusinnaasoq kukkunersiuisartut allapput.

Atuerujussuartoqartoq

Benzinamut akiliut 2017-imi atullattaarneqarpoq. Deloitte naapertorlugu akiliut 2017-imi qaammatini qulingiluani siullerni 91-eriarlugu atorneqarsimavoq. Trollemit 43-riarlugu, Orsiivimmi 47-riarlugu ataasiarlunilu Ilulissani atorneqarsimavoq.

- ’Nalinginnaasumik’ atuineq nassuiassallugu ajornakusoorpoq, atuinerulli piviusup kilometererpassuarnik ingerlasimanermik ilimatsatsitsivoq, kukkunersiuisut allapput.

AAMMA ATUARUK Demokraatit benzinasiniutissamut suliamut nalunaarusiaq utaqqimaarniaraat

Deloittep misissuinermini benzinamut akiliummik atornerluisimasoq aqqatigut allassimavaa, taannami atuarneqarsinnaajunnaarlugu titaqqavoq. Misissuinermittaaq allassimavoq Doris J. Jensen uialu minnerpaamillu inuk ataaseq naalakkersuisup biilianik, benzinamut akiliummik tassungalu isissutissanik atueriaannaasimasut.

Naalakkersuisoqarfiup politiinut 2017-imi unnerluutigisaa biilinut atuisinnaasutut allassimasut arlarineraat, KNR-ip Ilinniartitaanermut, Kultureqarnermut Ilageeqarnermullu Naalakkersuisoqarfik uppernarsaqqugaluarpaa. Naalakkersuisoqarfiulli tamanna akissuteqarfigerusunngilaa.

AAMMA ATUARUK Korti benzinasiniutissaq angallatip orsersorneqarnissaanut atorneqarpoq

Deloitteli misissuinermini naggasiilluni inassuteqarpoq:

- Qulaani pineqartutut benzinamut akiliummik inissiisarsimanermik atuisarsimanermillu ersersitsinermut naleqqiullugu akileraartartunit pissarsiat atornerini annertusaarinissamik akisussaassuseqarnermillu takutitsinerunissaq ataatsimut isigalugu inassutigaarput, Deloittes allappoq nangillunilu.

- Orsiinissamut akiliissutissaq tassungalu isissutissaq aarlerinanngitsumiitinnissaat inassutigaarput, taamaalilluni pisinnaatitaanngitsunit atorneqassanngimmat, kukkunersiuisut allapput.

Doris J. Jensenip politiinut unnerluutigineqartoq illoqatiginagu nammineerluni ilisimatitsissutigaa. Politiit unnerluutigineqartumut pasillerneq kingusinnerusukkut unitsiinnarpaat.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat