Doris: Pituffik upalungaarsimanissamut atorneqartariaqaraluarpoq
Umiarsuit ajutoorpata, avatangiisinilluunniit mingutsitserujussuartoqassagaluarpat umiarsuit annaassiniarnermut atugassat timmisartullu Danmarkimit Nunatsinnut Savalimmiunullu qanoq sukkatigisumik anngussinnaanersut paasiniarlugu illersornissaqarfik 2011-mi 2013-imilu sungiusarpoq.
Illersornissamut ministeri Nicolai Wammen, Naalagaaffiiup kukkunersiuisuisa isornartorsiuinerannut taama akissuteqarpoq, Issittumilu ajutoortoqartillugu piareersimasuutitanik peqartoqarnerarlugu.
Atortut assigisaallu Frederikshavnimiipput, soorlu assiaqutsit puttasut, containerit puttasinnaasut, pumpit avatangiisinillu mingutsitsisoqartillugu atortut allat. Immami avatangiisit pillugit immikkut ilisimasallit umiarsuarnut ilaatinneqartartut oqaatigineqarpoq.
Danmarkiminngaanniilli Nunatsinnukartarnerup sivisussusaa ministerip allaaserinngilaa, Folketingimullu ilaasortap Sara Olsvigip tamanna uggoraa:
- Illersornissamut ministerip akissuteqarnermini tamannarpiaq pillugu akissuteqannginnera soorunami naammaginanngilaq. Taamaattumik massakkut illersornissaqarfimminngaanniit nassuiaasiorluni aamma sukuiaasoqarpoq, uani pineqartumi Nunatsinnilu Issittumilu illersornissaq eqqarsaatigalugu qanorpiaq illersornissaqarfimminngaanniit iliuuseqartoqarsinnaaneranik nassuiaasussaallutik, Folketingimut ilaasortaq Sara Olsvig oqarpoq.
Nassuiaat uani eqqartugaa ukioq manna naatinnagu naammassineqareersimasussaavoq.
Sakkutuut umiarsuaataasa, sakkutuullu atortuisa annerusumik Danmarkimiitinneqarlutik Issittumiitinneqannginnerat, Naalagaaffiup kukkunersiuisartuisa aasaq isornartorsiuineranni ilaatigut apeqquserneqarpoq, soorlu aamma Issittumi alapernaarsuinermik suliaqarpallaannginnerat isorineqartoq.
SAREX-imik taallugu sakkutuut ukiumoortumik sungiusartarput. Nunat peqataasartut taassaapput Canada, Danmark, Finland, Island, Norge, Rusland, Sverige kiisalu USA.
SAREX-imilli taallugu aaqqissuussineq naammanngilaq, Issittumilu upalungaarsimaneq USA Islandilu peqatigalugit Danmarkimit Nunatsinninngaanniillu annerusumik suleqatigineqartariaqarlutik, Folketingimut ilaasortaq Doris Jakobsen oqarpoq:
- Frederikshavnimi inissinneqarnerat taanna isumaqarpunga pitsaasuunngitsoq. Uanga nammineerlunga aamma oqariartuutigisareernikuugakku Islandimi Pituffimmilu piareersimasoqartariaqartoq, ajunaarnersuaqassagaluarpat piareersimaneq Danmarkimiinnani Nunatsinniittariaqarpoq, Folketingimut ilaasortaq Doris Jakobsen oqarpoq.
Avatangiisit pillugit iliuutsit naammaginanngitsut, Naalagaaffiup kukkunersiuisuisa ilaatigut aamma oqaatigaat.
Illersornissamulli ministerip Nicolai Wammenip isornartorsiut taanna tusaatissatut tiguunnarpaa, sakkutuut avatangiisit pillugit pitsaanerusumik iliuuseqarsimasinnaanerat oqaatigalugu.
