Doris: Kalaallit piumasaat Danmarkip tusaanngitsuusaarsimavaa
Atomimik sakkussiat siaaruaanneqannginnissaannut isumaqatigiissummut ilassutip aamma Nunatsinnut atuunnissaa qallunaat naalakkersuisuisa qulakkeerniarsimanngikkaat, aviisimi Politiken-imi qulaajarneqareersorlu, Doris Jakobsen taama apeqquteqarpoq.
Isumaqatigiissummut ilassut Danmarkip namminermut tunngatillugu Savalimmiullu sinnerlugit atuutsilereernikuuaa. Kisianni Atomimik nukissiuteqarneq sakkoqarnerlu pillugit nunat tamalaat nakkutilliisuutitaa, IAEA, 2007-imiit siorna ilanngullugu piumasaqartaraluartoq, Danmarkip Nunatta isumaqatigiissummut ilaalernissaa pinngitsoortissimavaa.
Peqqussutip ilassutaa Nunattalu tassunga akuerseqataasimanera taamaannginneraluunniit Nunatta uranimik siunissami tunisassiuleratarsinnnaneranut avammullu tuniniaaleratarsinnaaneranut isumalerujussuuvoq.
- Uagut Siumumi Nunatta uran-imik tunisassiulersinnaanissaa kissaatigaarput, taamaaliornissarli avatangiisinut isumannaallisaanikkullu illersorneqarsinaasumik pissaaq. Taamaammat isumaqatigiissummi ilassutit Nunatsinni atuutsinneqalernissat Danmarkip isumagisimangimmagu, allaallu IAEA-p piumasaqaatai tusaanngitsuusaarsimammagit, ernumanarpoq. Doris Jakobsen tusagassiutinut nalunaarummini ilaatigut taama allappoq, qallunaallu nunanut allanut tunngasunut ministeriannut Villy Søvndal-imut ima apeqquteqaateqarluni:
- IAEA-p atomimik sakkussiat siaruarneqannginnissaanik peqqussutaata ilassutaa Kalaallit Nunaata inatsisartuisa tamarmiullutik maajip 18-ianni 2004-mi akuerereeraat, IAEA-lu tallimariarluni piumasaqaateqareeraluartoq, sooq qallunaat naalakkersuisuisa tamanna tusaanngitsuusaarsimaneraat, nunanut allanut tunngasunut ministerip nassuiarsinnaavaa? Doris Jakobsen taama ilaatigut apeqquteqaateqarpoq.
