Doris Jakobsenip kalaallisut soraarummeersinnaaneq ujartorpaa

- Atuarfitsialammi ilinniarfinnilu soraarummeernerni ilinniartitsisup censorilluunniit danskiunera allatulluunniit oqaaseqarnera apeqqutaatinnagu, atuartut ilinniartulluunniit namminneq oqaatsitik atorlugit misilitsinnissaannut pisinnaatitaaffiat qulakkeerniarlugu Naalakkersuisut peqquneqarnissaannik Inatsisartut upernaakkut ataatsimiinneranni 2007-imi saqqummiussara amerlanerussuteqartunit akuersissutigineqartoq, inatsisitigut malitseqarsinnaanerluni? Doris Jakobsen Naalakkersuisunut paragraf 36 naapertorlugu apeqquteqaateqarpoq.

Doris Jakobsenip tikkuarpaa, Kalaallit Nunaanni ilinniarfinni misilitsittoqaraangat kalaallisut nammineq oqaatsit atorlugit misilitsissinnaasannginnerat nalinginnaasuusoq, censorip imaluunniit ilinniartitsisup danskisut oqaaseqarnera pissutigalugu. Akerlianik danskisut oqaasillit misilitsinnermi kalaallisut oqalunnissaannik piumasaqarfigineqarneq ajorput, Doris Jakobsen allappoq, isumaqarlunilu kalaallisut oqaasilinnit taakku periarfissagissaarnerusartut.

Doris Jakobsenip siunnersuunni, tassa kalaallit atuartut ilinniagaqartulluunniit namminneq oqaatsitik atorlugit misilitsittarnissaannik, 2007-imi saqqummiummagu taamani Inatsisartunit amerlanerussuteqartunit akuersissutigineqarpoq.

- Siunnersuut akuerineqareersoq inatsisitigut maliseqarsinnaanerpa? Doris Jakobsen Naalakkersuisunut paragraf 36 naapertorlugu apeqquteqaateqarpoq.