Doris Jakobsenip danskit oqartussaasui naammagittaalliutigai
Suliniutit angisuut, assersuutigalugu London Miningitut ittut, aallartinnerisigut sullivinnik nakkutilliisoqarfiup suliassaqarnerulernissamut piareersaatai pillugit Doris Jakobsenip apeqquteqaataanut ministeri akissuteqarpoq. Ministerip akissuteqaataani atuarneqarsinnaavoq, piareersaateqartoqarani Namminersorlutik Oqartussat politiillu taamaallaat oqaloqatigineqarsimasut, kiisalu Danmarkimi oqartussaasut ikiortiserineqarsinnaasut.
-Suliniutit angisuut aallartinneqarpata, Danmarkip akissussaaffeqarfimminik isumaginninnissaminut piareersaateqarluarsimanissaa neriuutigalugu taamatut apeqquteqarpunga. Inatsisinik atortitsinermut ministerimut aamma apeqquteqarpunga, taannali suli akissuteqanngilaq. Tigussaasunik sunilluunniit piareersaateqartoqarsimannginnera paasillugu, aammalu suliniutit aallartinneqarpata aningaasanik amerlanerusunik pisariaqartinneqartussanik immikkoortitsisoqarsimannginnera ajuusaarnartupilussuuvoq, Doris Jakobsen oqarpoq.
Doris Jakobsenip partiiata Siumup suliniutit angisuut pillugit inatsisip akuersissutigineqarnissaanik akerliusupilussuunera ilisimaneqareerpoq. Partiip inatsisip akuerineqarnissaa tikitserlugu akuersissutigineqarnissaata kinguartinneqarnissaa neriuutigisimagaluarpaa, suliniutaasoq politikerinit innuttaasunillu paasisaqarfigilluarneqaqqullugu. Doris Jakobsenillu naammagisaqannginneq taanna Christiansborgimut eqqussimavaa.
-Naalakkersuisooqatigiit suliniutit angisuut pillugit inatsimmik tuaviuussinerat eqqumiigineqaannarsinnaavoq. Taamaammat piiaviit aallartinneqarpata sullivinnik nakkutilliisoqarfiup artorsinneqannginnissaa qanoq ililluta qulakkeersinnaaneripput Suliassaqartitsinermut ministerimut piaarnerpaamik oqaloqatigiissutiginiarpara. Taamaaliortoqanngippammi nakkutilliisoqarfiup suliaata sinneranut sunniuteqassaaq taamatullu aamma Nunatsinni suliffeqarfiit nalinginnaasut nakkutigineqarnerannut sunniuteqassalluni. Aammattaaq inatsisinik atortitsinermut ministeriaqarfiup piareersaateqarluarnerusimanissaa neriuutigaara. Akisussaaffeqarfimmi taanna artorsinneqareersimavoq, Doris Jakobsen isumaqarpoq.
