Doris Jakobsen unammilligaqanngilaq
Ippassaq unnukkut radioaviisimi oqaluttuaraarput Doris Jakobsen Siumumi siulittaasup tulliata aappaatut, tassalu aaqqissuussaanermi suliaqartussatut, qinigassanngortittoq. Oqaatigaarput taamaalilluni Kanukokap siulittaasuanut Jens Lars Fleischerimut unammillertussanngortoq. Taamaanngilarli.
Jens Lars Fleischer ullumikkut siulittaasumut tulliuvoq aaqqissuussaaneq akisussaaffigalugu, Siumullu pingasunngorpamiit Sisimiuni ataatsimeersuarnissaani politikikut siulittaasup tullinngorniarluni qinigassanngortippoq. Taanna Kalistat Lundip ullumikkut atorfigaa, namminersornerli pillugu ataatsimoortumik isumalioqatigiissitani siulittaasunngornini pissutigalugu qimattussanngorlugu.
Siumumi siulittaasup tulliatut siullertut qinigassanngortittut marluupput, tassami naalakkersuisuni ilassortaq Jens Napaattooq sassarniarluni nalunaareerpoq, taamaalilluni politikikkut pingaaruteqartumik siulittaasumut tullinngorniunneq aallartereerpoq.
