Doris Jakobsen: Siumumi qinersisoqaqqikkallassanngilaq

aggustip 29-at 2005 16:38

- Siumumi eqqissiviilliortoqaraluaqisoq ataatsimeersuartoqaqqissanngilaq siulersuisut amerlanerussuteqartunit qinerneqarnikuummata, tamannalu ataqqivara, Siumut aaqqissuussaanermut siulittaasup tullia Doris Jakobsen oqarpoq. Siumut Nuuk piumasaqarpoq Siumut siulittaasua naalakkersuisut siulitaassuattut partiimilu siulittaasutut taarserneqartariaqartoq. Tamanna Doris Jakobsen-ip isumaqatiginngilaa:

- Siumumi ataatsimeersuarsimaneq taama qanitsigitillugu amerlanerussuteqartullu

Siulittaasussamik toqqaasimanerat eqqarsaatigalugu, massakkorpiaq taarsiinissaq pissutissaqanngilaq. Immikkoortortaqarfiillu saaffiginnissutaat nalilersoqqaartariaqarput, massakkumi ataasiinnaq tassa Siumut Nuuk nalunaaruteqarsimammat.

Nutaamik ataatsimeersuartoqarsinnaanera eqqarsaatigalugu immikkoortortaqarfiit amerlanerusut saaffiginnissappata nalilersueqqaartoqassasoq Doris Jakobsen oqarpoq.

Paasilluarsinnaanerarpaa Siumut Nuup Siumumi ajornartortiutit taama inissisimatillugit saaffiginnisuteqarnera.

- Amerlanerussuteqartulli qinersisimanerat ataqqisariaqarpoq.

Doris Jakobsen-ip erseqqissarpaa Siumumi siulersuisut ataatsimeeqqammersut ataatsimiinnermilu Siumut siulittaasussaanik qinersisoqaqqinnginnissaa aalajangiussimaneqartoq.

Doris Jakobsen aamma isumaqannginnerarpoq Naalakkersuisut siulittaasuat Hans Enoksen taarserneqartariaqartoq Siumumi siulersuisuunernik suleqateqarnera isornartoqanngimmat, aningaasanullu inatsisisaq maanna suliarineqaleruttormat.