Doris Jakobsen pilliutigineqartutut misigaaq

- Naalakkersuisooqatigiit ataannassappata pisariaqarsimavoq tunuartinneqarnissara.

Doris Jakobsenip Kultureqarnermut ilinniartitaanermullu Naalakkersuisutut tunuartinneqarnini taama nalilerpaa, suliniullu ”Inuuneritta”-mik taasaq pissutaalluni, Doris Jakobsen naalakkersuisutut Hans Enoksenimit tunuartinneqarluni.

Kultureqarnermullu naalakkersuisuusimasup Doris Jakobsenip Inuit Ataqatigiit pisuutipai, tunuartinneqarnissaminik piumasaqarsimasutut.

- Peqqissutsimut naalakkersuisoq, Asii Chemnitz Narup, minnerunngitsumik mamiatsalluni naalakkersuisutut tunuarniarluni aalajangersimavoq. Asii tunuarpat uanga tunuartitaanissara Inuit Ataqatigiit piumasarisimavaat. Naalakkersuisooqatigiit ingerlaannassanersut, uangaluunniit tunuartitaanissara, naalakkersuisut siulittaasuata taamaalilluni qinertariaqalersimavaa, Doris Jakobsen oqarpoq.

Hans Enoksen aperaarput, Doris Jakobsen sooq tunuartitaasimanersoq, ima akivoq:

- Naalakkersuisuni ataatsimoorluta aalajangiiffigisarput, Inuunerittamik taaguutilik, naalakkersuisut ataasiakkaat allanngortinniarsarisinnaanngilaat. Naalakkersuisut aalajangeriigaat naalakkersuisuni ilaasortat ataasiakkaat ilumoorfigalugu suliariniartussaavaat. Naalakkersuisuni suliniut Inuuneritta akuereerlutigu peqqissutsimut ataatsimiititaliami tusarniaassutigineqarmat atorsinnaanngitsutut illersorneqarsinnaanngitsutullu kultureqarnermut naalakkersuisoqarfimmit nalilersorneqarpoq.

- Suliniut taanna naalakkersuisuni tamakkiulluta akuerereernikuugatsigu inatsisartunut ingerlateqqittussaavarput. Kultureqarnermulli naalakkersuisoqarfimmit, nalilersuinerup kingunerisaanik, naalakkersuisut sulinerat innarlerneqarujussuarpoq. Taannalu uanga naalakkersuisuni siuliuttaasutut akuersaarsinnaanngilara, Hans Enoksen oqarpoq.

Asii tunuarpat Doris Jakobsenip tunuarnissaanik IA-kkut piumasaqarsimanerat Hans Enoksenimut eqqaagatsigu ima akivoq:

- Nammineq taama nalileerusukkuni naliliissaaq. Naalakkersuisut aalajangeriigaat naalakkersuisoqarfiit ataasiakkaat eqqunngitsumik allanut nassuiaatigissanngilaat. Taama nassuiaasoqarsimassappat naalakkersuisooqatigiinni tatigeqatigiinnerput sumiilissava ? Aalajangikkavut pillugit eqqunngitsumik allanut oqaluttaqattaarnitsigut, taannaana unitsiniaringa, Hans Enoksen oqarpoq.

- Taamatut aalajangertariaqarneq uggornaqaaq, ajuusaarnarpoq pakatsinarlunilu. Inatsisinik ataatsimilluuniit unioqqutitsinikuunnginnama. Unneqarillunilu sulineq inuit tamat oqartussaaqataanerata apeqquseraa uanga isumaqarpunga, Hans Enoksen naggasiivoq.