Doris Jakobsen: Paamiut mittarfissaa nunanit allanit aningaasalersorneqarsinnaavoq

Allattoq Mads Lynge
juulip 19-at 2005 14:43

Siumut sinnerlugu inatsisartuni ilaasortap Doris Jakobsenip, periarfissaanerarpaa Paamiuni mittarfiup sananeqarnissaanut nunanit allaneersunik aningaasaliisoqarsinnaaneranut nunarput eqqumanerusariaqartoq:

- Paamiut mittarfilerneqarnissaannut tunngatillugu isumaqarpunga nunanit allaneersunik aningaasaleerusuttoqassappat tamanna eqqumaffigisariaqaripput, Doris Jakobsen oqarpoq.

Paamiut mittarfeqalernissaa inatsisartuni amerlanerussuteqartunit tapersersorneqaraluartoq, aappaatigooqartinneqartoq ullumi ullo’qeqqanut radioaviisimi tusarliupparput.

Illua’tungiliuttuni Demokraatit siulittaasuat Per Berthelsen oqarpoq naalakkersuisut sipaaruteqarniaannarlutik taamatut aaqqissuuteqartut.

Siumumeersup Ole Dorphip suliaq pipallataavallaarnerarpaa, taamaammallu mittarfiup sananeqarnissaa nangaanartoqartillugu:

- Imminut aperivunga: Sooruna? Qaammatit marlussuit matuma siornatigut Nuup Ilulissallu mittarfii tallineqarnissaat naalakkersuisunit annertuumik eqqartorneqarput, maannakkulli taakku peeriarlugit Paamiut qaqinneqariasaarpoq, Ole Dorph oqarpoq.

Inuit Ataqatigiinneersup Aqqalukasik Kanuthsenip partiit allat paasisinnaannginnerarpai Paamiuni mittarfeqalernissamut qularmata:

- Aappaatigooqartitsisinnaaneq uanga apeqqusilaarsinnaavara, paasineqareermat 2006-iminngaanniit silaannakkoorullugu ilaasunik angallassineq inuiaqatigiinnut akilersinnaanerusoq, Aqqalukasik Kanuthsen oqarpoq.