Doris Jakobsen: Naqinnernik ilisarinnissinnaanngitsut atuarfeqalerlik

Naqinnernik ilisarinnissinnaanngitsunut nunatsinni immikkut atuarfimmi pilersitsinissaq anguniarlugu Naalakkersuisut suliaqaqqullugit peqquneqarnissaat inatsisartut aalajangiiffigisariaqaraat, Siumumeersoq Doris Jakobsen isumaqarpoq.
Allattoq Najaaraq Egede
oktobarip 12-at 2007 10:40

Doris Jakobsen inatsisartut ukiaanerani ataatsimiinneranni aalajangiiffigisassatut siunnersuuteqarpoq, paaserunneqarluni nunatsinni atuarsinnaanatillu allassinnaanngitsut meeqqat inersimasullu atuarfissaannik pilersitsisoqassanersoq.

Aamma isumaqarpoq nunatsinni oqartussat taarsiiffigitinnissamik qinnuteqartoqarnissaanut aamma sillimasariaqalersut. Sillimaffigisassaq tassaavoq naqinnernik ilisarinnissinnaanngitsut nappaataannik dysleksi-mik nappaatillit ilinniarnissaannik iluamik periarfissiisimanngitsut taarsiiffigeqqulersinnaanerat.

Danmarkimi nutaarsiassatigut ukioq manna saqqummerpoq naqinnernik ilisarinnissinnaannginnermik nappaatilik kommunerisaminit ilinniagaqarnissaminut ikiorserneqannginnini pillugu taarsiiffigitittoq.

- Isumaqarpunga nunatsinni uagut aamma assinganik nalaattaqariaannaasugut ajornartorsiut iliuuseqarfiginngikkutsigu, Doris Jakobsen oqarpoq.

Taamaattumik siunnersuutigaa, immikkut ittumik innarluutilinnut meeqqanut inersimasunullu atuarfimmik pilersitsisoqassasoq. Narsami atuarsinnaanngitsut allassinnaanngitsullu atuarfiat pikkorissarfittut Narsarmiunuinnaq ullumikkut atorneqarpoq.

Radioavisimi innarluutillit sapaatip-akunneqarnerannut matumunnga atatillugu ippassaq unnukkut ilanngutassiaraarput, arnaq naqinnernik ilisarinnissinnaanngitsoq ilinniarusussinnaasorlu. Ilanngutassiamut tassunga atatillugu Doris Jakobsen ilisimatitsivoq atuarfimmik nunatsinneersunut tamanut atuuttumik pilersitsinissaq pisariaqarluinnalersoq.

Naqinnernik ilisarinnissinnaanngitsut atuarfeqalernissaannut tunngatillugu inatsisartunut aalajangiiffigisassatut siunnersuut inatsisartut oktobarip ulluisa 22-anni oqaluuserissavaat.