Doris Jakobsen Naalakkersuisoqarfimmik nutaamik siunnersuuteqarpoq

Doris Jakobsen naalakkersuisunngortitsiniarnerup nalaani Nicolai Wammen, illoqarfinnut, inissianut nunallu immikkoortuinut Naalakkersuisoq naapisimaarnerani erseqqissaatigaa naalakkersuisoqarfimmik nutaamik pilersitsisoqartariaqarneranik. Piumasaqaataa tusaaniarneqanngitsoq, taamaattorli Doris Jakobsenip tamanna puigunngilaa.

-Issittoq pillugu pisuussutit silallu allanngoriartornera  sammineqartorujussuuvoq, isumaqarpungalu issittup saqqumilaartinnissaa pingaaruteqartorujussuusoq. tamannalu issittumi naalakkersuisoqalerneratigut pisinnaavoq, oqarpoq.

Doris Jakobsen oqaaseqarnissamini, ilaatigut qallunaat nunaanni kalaallit ilinniartut atukkatigut pitsanngorsaavigineqarnissaat pingaarutilittut eqqaaniarpaa, kiisalu innarluutillit ukiumut ataasiarlutik nunatsinnut angalatinneqarnerannut tunngatillugu, ingiaqateqartinneqarlutik angalatinneqartarnissaat pisussaaffiummat. Aammalu meeqqat atuarfianni Kalaallit Nunaannut ilinniutit pitsanngorsarneqarnissaat.

-Ataasiarnanga ilinniartitsisuniit qallunaanit tusartuartarpara, ilinniusiutit Kalaallit Nunaannut tunngasut nutaanngilivallaarsimasut, kingunerisarpaalu Nunarput pillugu qangatut suli isiginnittartunik. Taamaattumik ilinniusiutit nutarsarneqarnissaat pingaarutilerujussuuvoq, qallunaat inuusunnerit ullutsinnut tulluartumik nunarput ilisimaarilluassagunikku, oqarpoq.

Doris Jakobsen tassa pingajussaa Folketingep oqaluttarfia oqaaselugiarfigissavaa, siullermik oqaaseqaqqaarpoq Lars Emik Johansen taartaaffigalugu 2009-mi oqalugiarami. Sara Olsvig IA-miit unnugu siullermeerluni Folketingemi oqalugiassaaq.

-Assorsuaq pissangavunga, qinikkatummi aatsaat oqalugialerpunga. Uannullu ammaanermut oqaluuserinninneq  pingaarutilerujussuuvoq. Kiisalu Statsministerip ammaanermi aqalugiaataa qisuariaateqarfigisinnaagakku, Sara Olsvig oqarpoq.

Akerlianik Doris Jakobsenip ammaanermi oqalugiaatissaminik saqqummiussinerani, Sara Olsvigip oqaatigerunngilaa suut ammaanermi oqaatigissanerlugit.