Doris Jakobsen: Ministerip akissutai iluamik akissutaanngillat

Camp Century Thulep timaani inissinneqarsimasoq atomilu atorlugu ingerlanneqartoq, Danmarkip naalakkersuisuinit eqqasuutigineqartoq qangali tusartarparput. Doris Jakobsen allappoq nangillunilu.

Qallunaat eqqasuutaat taakku nunanut allanut tunngasunut ministerip akissutaani eqqaaneqanngillat. Taamaallaat akissutaani eqqaamaqquneqarpoq, amerikamiut Nunatsinni sakkutooqarfiliornerisa kinguneranik, Danmarkip USA 1950-ikkunnili isumaqatigiissuteqarmata tamanna eqqaamasariaqartoq. Aamma ilanngullugu eqqaamaqquvaa, illersornissaq pillugu 1951-imi isumaqatigiissut aamma Igalikumi isumaqatigiissut 2004 atsiorneqartoq. Taakkuli isumaqatigiissutit Camp Centurymut attuumassuteqanngillat, Doris Jakobsen allappoq.

Doris Jakobsenip taama apeqquteqaateqarnerminut tunngavilersuutaasa ilagaat, sermersuatsinni inissinneqarsimasup assinga, Sikuiuitsumi Kujallermi inissinneqarsimagaluarmat, taannali atorunnaarsimasoq taassuma sunik tamanik ajoquteqartarnera aamma ajutoortoqartarnera pissutigalugit.

- Tamanna ilumoorpat taava upperiuminaappoq sermersuatsinnut inissitap allaanerunissaa, taamaattumik paasisariaqarparput, atomi atorlugu ingerlanneqartoq qanoq nakkutigineqarnersoq, Doris Jakobseb allappoq.

Taassuma allakkamini aamma oqaatigaa, Sorsunnerup nillertup nalaani, Kalaallit Nunaannut tunngatillugu tamaani sillimaniarnermut politikkip, Danmarkip USA-llu misissuisitaasa, Dansk Udenrigspolitisk Institut-ip misissuereernerminni 1977-imi saqqummiussaannut, nunanut allanut tunngasunut ministerip akissutai naapertuutinngitsut.

Nalunarusiamimi tassani atuarneqarsinnaavoq, Camp Century-p siuliatalu Camp Fitsclench-ip, Sermersuarmi qinngortoqisumi suliarineqarneri sanaartorneqarnerilu Danmarkimit akuersiutinik peqaqqaarani aallartinneqarsimasut. Aamma taakku tammaarsimaarfiit, amerikamiut sakkutooqarfiannik Thule-mi pilersitsinermi nunaminertamik atugassiissuteqarnermut attuumassuteqanngitsut, Doris Jakobsenip oqaatigalugu.

Tammaarsimaarfiit atomimik ingerlatillit sermersuarmi atulereersullu USA Danmarkilu isumaqatigiissusiorsimapput aamma Danmarkip nammineerluni suliniuteqarnermigut tammaarsimaarfiit atomimik ingerlateqarsinnaaneri isumaqatigiissusiorfigineqarsimapput.

Tassalu tamakku ilaatigut pillugit, Doris Jakobsenip nunanut allanut tunngasunut ministeri nassuiaaqqusimagaluarpaa.