Doris Jakobsen: Inuusuttut suliffissaaleqisut nulukkut "isimmittarlugit" kaammattorneqartariaqarput

- Ajornartorsiut nunatsinni annertoorujussuuvoq. Nalunngilarput tunniunneqartartut ullunut 14-nut inunnut ataatsiakkaanut annikitsuararsuusut aamma inuuniutigissallugit annikippallaartut. Taamaakkaluartoq inuttut nammineq isumaqarpunga piumasaqaatigut annertunerusinnaasut, Doris Jakobsen oqarpoq.

Taanna isumaqarpoq inuusuttut suliffissaaleqisut amerlavallaartut, ikiorneqanngitsullu kaammattorneqartariaqartut. Massakkullu inuusuttut suliffissaaleqisut iliuuseqarfigineqanngikkunik siunissami suliffissaaleqisut amerligaluttuinnarnissai, nunattalu aningaasaqarnera qaffakkiartulernavianngitsoq ernummatigalugu.

- Massakkut inuusuttut suliffissaaleqisut uninngatiinnarlugit suliffissaaleqinermi aningaasanik tunioraannarutsigit, nunarput iluamik aningaasarsiornavianngilaq. Aatsaat sulisilerutsigit nunatta aningaasaqarnera qaffakkiartulersinnaavoq. Suliffissaaleqisunik sulisitsiniarluni piginnaanngorsaanerit aammalu piumasaqarnerit siunissami imminut akilertussaapput, Doris Jakobsen oqarpoq.

Taanna isumaqarpoq inuusuttut suliffissaaleqisut aningaasanik tunioraannarneqartut sinnassaannarneqartut.

- Inuusuttut suliffissaaleqisut aningaasanik tunioraannarlugit ajuusaarnaraluartumik oqarsinnaavunga ilarpassui sinnassaannartarpagut. Piumassusaallu annikillisikkiartuinnartarlugit. Inuit suliffissaaleqisut annerusumik passunneqanngikkaangamik sulisinniarneqanngikkaangamik nikalloraluttuinnartarput tunuarsimaartunngortarlutillu. Immaqalu ilarpassui ajoraluartumik, pinerlunniarnermut pulasarput, Doris Jakobsen oqarpoq.

Taassuma inuusuttut suliffissaaleqisut nulukkut isimmittarlugit piumassuseqalersinnissaat pisariaqartippaa.

- Qallunaat oqartarnerattut "Spark i røven" soorlu nulukkut isimmitsinneq, taanna allatut ajornartumik pisariaqarsinnaavoq inuttut ingerlaqqissagaanni. Sulinani unittuuginnaraanni imminut tatigineq unikkiartuinnartarami, taavalu aamma  ajoraluartumik inuiaqatigiit iluanni tammavittutut pisinnaasarlutik. Taamaammat ikorfartorneqarluni taamatut isimmitsilaarneq inuusuttunut iluaqutaasinnaasoq, Doris Jakobsen oqarpoq nangillunilu.

- Siornatigut misilittagaareernikuugaluarpoq illoqarfimminngaanniit ungasissuminngaanniit, soorlu qaanaaminngaanniit nuummut nassiullugit suliartortillugit. Kisianni taanna inuiaqatigiinnut akisuallaarnikuuvoq. Massakkullu kommunit aggulunneqarnikuupput. Taamatut periarfissat nutaat atorneqarsinnaagaluarput. Isumaqarpunga tamakku periarfissat nutaat atorneqarsinnaasut, Doris Jakobsen oqarpoq.

Taanna aamma isumaqarpoq Danmarkimi Islandimilu inuusuttut suliffissaaleqinerat akiorniarlugit iliuuserisartagaat isumassarsiorfigineqarsinnaasut.