Politikki Kulturi

Doris Jakobsen: IA qineqqusaalereerpoq

Siumumeersup Doris Jakobsenip Folketingimi sulinerminik sumiginnaaneragaanini ilumuunnginnerarpaa. Taama pisoqarpoq Inuit Ataqatigiit Inuusuttaasa qinikkatut Folketingimi suliassaminik sumiginnaanerareeraannilu.

Allattoq Helle Nørrelund Sørensen

marsip 27-at 2015 13:10

Nutserisoq Erna Lynge

- Isumaqarpunga ersarissoq IA'p qineqqusaarnini aallartereersimangaa, appisaluussilluni politikkikkullu sulianik nammineerussilluni.

Taama oqarpoq Siumup folketingimi ilaasortaatitaa, Doris Jakobsen, IA'p Inuusuttaaneersup Jane Petersenip foketingimi sulinermini sumiginnaanerareeraanilu.

Tamaattoqanngittorli Doris Jakobsen isumaqarpoq:

- Folketingimi sulineq assut soqutigaara, tamannalu takuneqarsinnaavoq apeqquterpassuaqartarama, EU-milu ataatsimoorussinissaq suliniutigisimallugu, IA nammineerluni ingerlatsisoq.

Aamma atuaruk Pituffik aamma puisit amiinik EU-mut eqqusseqqusiunnaarneq Folketingimi sammineqarput

Inuit Ataqatigiit Inuusuttai isornartorsuipput, Doris Jakobsen Folketingimi marlunngormat ministeriunermut apeqqarissaarnermut peqataanngimmat. Taannami Kujataani angalavoq Folketingimi sulinini oqaluttuariartorlugu.

Atlantikup Avannaamiut qaammatit pingasukkaarlugit ministeriunermut Folketingimi apeqqarissaartarput, Jane Petersenilu isumaqarpoq Doris Jakobsen peqataasimasariaqaraluartoq suliat Pituffimmut EU-llu puisip amii pillugit politikkianut tunngatillugu.

Doris Jakobsenili isumaqarpoq, Pituffimmi isumaqatigiissut pillugu Danmarkip, nunatta USA-llu akornannit isumaqatigiinniarneri naammassinissaannut eqqissisimatinneqartariaqartut:

- Isumaqatigiinniarnerit ingerlapput. Isumaqarpunga ajunnginnerusoq ingerlatiinnaraanni inerniliisoqarnissaa tikillugu. Isumaqatigiinniarnerit ataqqisariaqarpavut.

Kisianni puisit amiinik EU-mut eqqusseqqusinnginermi naggueqatigiit Inuit pineqannginnerisa sukateriffiginiarneqarneranni, EU-mut nunarput sukataarnerusariaqartoq, Doris Jakobsen isumaqarpoq.

Tarsiullugu Kalaallit Nunaanni angalaneq taama pingaaruteqartigisoq, taanna isumaqarpoq:

- Isumaqarpunga Kalaallit Nunaanni innuttaasunik ataatsimiisitsineq taama aamma pingaartigisoq. Amerlasuummi isumaqarput folketingimut ilaasortat taamaallaat qineqqusaaraangasa tusartarlugit, sulinerpullu inerneqanngisaannartut. Suliassatut pingaartutut isigaara innuttaasut naapinnissaat, Folketingimilu suliatsinnik oqaluttuullugit.
Doris Jakobsen Peqqinnissamut naalakkersuisutut sulinngiffeqarpoq, Nick Nielsenip soraarsitaanerata kingorna Folketingimut utertitaangami.

Oqaatigerusunngilaalu folketingimut qineqqusaaqqissanerluni.