Doris Jakobsen erninissamut atatillugu sulinngiffeqarpoq
Doris Jakobsenip sulinngiffeqarnerani Jens Immanuelsen Upernavimmeersoq, Inatsisartuni Siumut sinnerlugu taartaassaaq.
Doris Jakobsen Kommuneqarfik Sermersuumi kommunalbestyrelsimut aamma ilaasortaavoq, maannalu borgmesterimut tullersortaalluni. Taartissaatut siullerpaalluni allassimavoq Vittus Mikaelsen.
Doris Jakobsen atuuffimminut qaqugu uteqqissanersoq suli paasinarsinngilaq. Tamatumani taassuma naartunermini erninerminilu sulinngiffeqarnissaq ataatanngortussallu qanoq agguataarsimaneraat aammalu meeraaqqerivimmi inissaqalernissaq apeqqutaapput.
Juliane Henningsen IA-meersoq naartunerminut erninerminullu atatillugu Inatsisartunit sulinngiffeqarpoq, ullut 14-it qaangiuttut peqqivissumik panissaareernermi kingornagut. Taanna Inatsisartunut ukiaru uteqqissaaq.