Doris Jakobsen danskit ministeriinut marlunnut tamanut ammasunik allagaqarpoq

Taamatut saaffiginnissuteqarnera GrønlandsBankip pisortaanerata Martin Kviesgaardip Doris Jakobsenimut ippassaq saaffiginnissutaanik aallaaveqarpoq. Taassuma Nunatsinni eqqartuussiveqarnermi suliassat qaleriiaatiinnaleqqanerisa ajornartorsiutinik annertuunik pilersitsinerat uparuarpaa.

Kalaallit Nunaanni eqqartuussiveqarnermi suliassatigut angummassinnaannginneq pissutigalugu eqqartuussivimmut suliassanngortitat hundredelippassuit suliarineqaratik qaleriiaatiinnaleqqapput, tamannalu  Nunatsinni illusiniarnermut atatillugu taarsigassarsisitsisarnermik ulorianartorsiortitsivoq.

Tamanna Realkreditimik taarsigassarsisitsisarfinnut ajorluinnartumik kinguneqarsinnaavoq, imaluunniit Martin Kviesgaardip toqqaannartumik allanneratut:

- Ajorluinnartumik kinguneqarsinnaavoq, allaat Realkreditimik taarsigassarsisitsisarfiit Nunatsinni eqqartussiveqarneq ingerlanngingajattoq pissutigalugu Kalaallit Nunaanni taarsigassarsisitsisarunnaarsinnaallutik, GrønlandsBankip pisortaanera allappoq.

Doris Jakobsenip ajornartorsiut arlaleriarluni danskit naalakkersuisuinut apuuttaraluarpaa, suliassallu qaleriaatiinnaleqqanerinik ajornartorsiut aaqqiiviginiarlugu Danmarkimit ikiuiartortussanik noqqaasarsimalluni. Aamma danskit aningaasanut inatsisissaata septembarip qaammataani siullermeerneaarneranut atatillugu ajornatorsiut qaqissimavaa.

Doris Jakobsenillu danskit Aningaasaqarnermut ministeriannut Inatsisinillu atortitsinermut ministeriannut suliaq kingumut qaqeqqippaa Nunatsinnilu eqqartuussiveqarnermi suliassatigut angummassinnaajunnaaqqaneq aaqqiiviginiarlugu erngertumik iliuuseqaqqullugit.