Doris Jakobsen araberinik naapitsissaaq

Angalanermi paasisassarsiornerusumi Tyrkiami Aningaasaqarnermut Naalakkersuisumik, ilaatigullu Tyrkiami inatsisartut naapissavaat. Angalanerli nuimanerinnarnik naapitsiviussanngilaq.

- Tyrkiemi oqaluffissuaq Cave of Sankt Peter alakkassavarput, oqaatigineqartarpoq taanna oqaluffissuaq kristumiut oqaluffianni nunarsuarmi pisoqaanersat ilagigaat. Aammali kunngip iliversui pyramidet Cairop ungataani alakkassavagut, Doris Jakobsen knr.gl-imut oqarpoq.

Angalanerli takornariarnerinnaassanngilaq, Tyrkiep Syriallu killeqarfianni qimaasut najugaqarfiat alakkassavaat. Taakku ilaatigut nunatsinni aningaasanik katersiniarnermit aningaasaliiffigineqartartut ilagaat.

- Uanga siornatigut Unicefimi sulinikuuvunga, tassungalu atatillugu Afrikami qimaasut inissiaanni sulinikuullunga, taamaattumik pissanngatigisorujussuuara nunatsinniit katersat ilaat sumut atorneqartarnersut, Doris Jakobsen oqarpoq.

Doris Jakobsen siullermeerluni Folketingimi ilaasortatut nunanut allanut angalalerpoq. Angalaneq iluatsillugu nunarput nittarsaanniarpaa.

-Eqqarsaatigaara atuagaq "This Is Greenland" nassarniarlugu taanna assiliartagissaarmat. Assitamigulli nutartigassaavoq. Takutikkusupparami Nunarput nutaaliaasoq, assitaasalu nutarsagaasinnaanissaat neriuutigaara, Doris Jakobsen knr.gl-mut oqarpoq.

Paasisassarsiorlutik angalanerminni Doris Jakobsen nunani ornitaminni suleqatini naapinnissaat periarissarissavaa.

- Angalaninni naatsorsuutigaara nunani allani ineriartorneq paasisaqarfigilluinnassalugu. Ingammik maanna nunarsuarmioqataanitsinni Tyrkiemi Igitsinimilu uagutsinnut soqutiginaateqartarmata. Neriuutigaara angalaninni ilisimalikkakka Nunatsinnut ingerlateqqissinnaassallugit, Doris Jakobsen oqarpoq.

Angalaneq pissaaq sapaat oktobarip 30-aniit tallimanngorneq novemberip sisamaata tungaanut.