Doris Jakobsen Anthon Frederiksenimut akivoq
Atuartut ARTO-mik atuinerat naalakkersuisut akilertarumajunnaarmassuk inatsisartunut ilaasortap Anthon Frederiksenip sapaatip akunnerani kingullermi isornartorsiuinera atuartitaanermut naalakkersuisup, Doris Jakobsenip, maanna akissuteqarfigaa.
-ARTO-mik atuinerup ukiup atuarfiusup matuma naaneraniit atuutilersumik Namminersornerullutik Oqartussanit akilerneqarsinnaannginnerannut pissutaavoq, ARTO-mi ingerlatat atuartitsinermut naleqqutinngitsutut naliliiffigineqarnerat’ naalakkersuisunut ilaasortaq, Doris Jakobsen, allappoq.
Tamatumunnga peqatigitillugu maluginiarneqassaaq, ATTAT-mik ingerlatsinerup 60 aamma 80 procentia ARTO-mut atorneqartarmat.
Tamatuma kinguneraa ARTO-mik atuinikkut ATTAT-mut aningaasaliissutitigut killiliussat ilarparujussui ARTO-mut atorneqartarmata, taamaattumillu ATTAT-mut ingerlatassatut naatsorsuutigineqartut naammassineqarsinnaajunnaarlutik, Doris Jakobsen nassuiaavoq, erseqqissarlugulu naalakkersuisut akunnerminni atuartitsineq pillugu suleqatigiinnerannut aamma ilinniarfiit suleqatigiinnerannut ATTAT pingaaruteqarluinnartuusoq.
