VIDEO Doris: Hashimik inerteqqutaajunnaarsitsinerup pinerlunniartartut amerlisissavai
- Ersarilluinnartumik naalakkersuisooqatigiit oqariartuuteqarput, ikiaroornartumut nultoleranceqarlutit, aamma taanna attattuaannartussatut isikkoqarpoq.
- Aamma takusinnaagatsigu nunani allani soorlu ajornarunnaarsinneqarnerata kingornatigut qanoq ajortigisumik sunniuteqartoq assersuutigiinnarlugu Colorado (USA-mi naalagaaffik).
- Tassani takuneqarsinnaavoq, ikiaroornartoq inerteqqutaajunnaarsinneqarmat meeqqat toqquteqartartut amerlipput, ikiaroornartoq pissutaalluni, kisianni aamma biilinik amerlipput taavalu aamma pinerlinniartarnerit qaffarujussuarput. Taamaammat inuiaqatigiinni taamatut pinissarput akissaqartinngilarput, peqqissutsimut naalakkersuisoq Doris Jakobsen KNR-imut oqarpoq.
Aamma atuaruk Naalakkersuisut maligassiuerusupput
Aamma atuaruk Naalakkersuisut hashitorsimanersut paasiniarlugu qoorsiortilersut
Tarnimikkut nappaatit aningaasanit pingaarnerupput
Inerteqqutaajunnaarsitsineq sumiiffinni allani naalagaaffiit aningaasaqarnerannik qaffatsitsigaluartorluunniit naalakkersuisup tamassuminga itigartitsivoq.
- Eqqarsaatigisariaqarparput hashpsykosertut taava qanoq amerlatigilissappat aamma tamakku sillimaffigisassaapput. Nunatsinnut aamma nanertuutaasussaasut.
- Uagut naalakkersuisooqatigiinni isumaqarpugut tamanna aqqutissaanngilluinnartoq, akilersinnaanngimmat inuppassuit taava aamma ikitsigaluta.
Tuniniaaneq aqunneqarsinnaanerussaaq
Hashimilli inerteqqutaajunnaarsitsinerup ajornartorsiutit aaqqiivigineqarsinnaanerulersissagai Nuummiu Aqqalu Engellili isumaqarpoq. Hashimmi inerteqqutaaginnarnerata ajornartorsiutit ajornerulersiinnassagai isumaqarpoq.
- Killeqanngivissumi tuniniaasoqarpoq, naalagaaffiulli aqulertuuppagu allanngussagaluarpoq, akigititat ikiaroornartullu akui aqunneqalissagaluarput, Aqqalu Engell KNR-imut oqarpoq.
Siunnersuuteqarnera annerusumik uani takujuk:
Inerteqqutaajunnaarsitsinerulli ajornartorsiutit annikillisinnavianngikkai, Doris Jakobsen isumaqarpoq.
- Isumaqarpunga taanna misilittakkat takutitaat soorlu Coloradomi taanna takutinneqareertoq ajornartorsiutit annertuneruliinnarput hashpsykosertut amerlipput, ajutoortartut amerlipput, taava aamma pinerlunniartarnerit annertusipput, ataatsimut isigalugu aningaasartuutit annertusipput, taamaammat isumaqarpugut, taanna Nunatsinni aqqutissaanngitsoq, Doris Jacobsen oqarpoq.
Nakorsaatit Cannabisimik akullik Danmarkimi nakorsanik tunniunneqarsinnaapput, nakorsaatinilli taamaattunik tunniussiniaraanngamik akuersissummik qinnuteqaqqaartarput. Nakorsalli akornutigisartagaanik atorunnaarsitsinissamut hashimik nakorsaatitut atortoqarsinnaanernissamut inatsisissatut siunnersuut folketingimi suliarineqarpoq.