Doris folketingimut qinigassanngortissamaarpoq
Doris Jakobsen maannakkut inatsisartuni ilaasortaasoq, qineqqusaarnissamik piareersarpoq, folketingimilu socialdemokratit gruppeanni ataatsimeeqateqartareersoq, sermitsiaq.ag-mi allaaserineqarpoq
Doris Jakobsen inatsisartuni Siumut sinnerlugu inuussutissarsiutit sulifissaqarnerlu pillugu oqaaseqartartuuvoq, qanittukkullu inuussutissarsiuteqarneq pillugu ataatsimiititaliami ilaasortanngorluni.
Doris Jakobsen nunat avannarliit killiit siunnersuisoqatigiiffianni ilaasortaavoq aammalu kommuneqarfik Sermersumi kommunalbestyrelsemi ilaasortaalluni.
Doris Jakobsen Hans Enoksenip naalakkersuisunut siulittaasuunerata nalaani, Kultur ilinniartitaanerlu pillugit naalakkersuisuuvoq aammalu Lars-Emil Johansenip folketingimi sulinngiffeqarnerani sinniisutut inissisimanini atorlugu folketingimi sulisarsimalluni.
Inuit Ataqatigiit qulakkeerlugu nalunaarutigaat, tulliani folketingimut qinersinissami Juliane Henningsen qinigassanngortissasoq.
