Doris: Aningaasat annissorneqartut nakkutigineqarpat ?

Doris Jakobsenip paaserusuppaa, Kalaallit Nunaat aqqusaarneqartarnersoq qallunaat aningaasaatitik akileraannginnissaq anguniarlugu toqqortuinialeraangasa.

Aningaaseriviit nunatsinniittut pinngitsooratik paasissutissanik tunniussuisinnaatitaanngillat, soorlu qallunaat aningaaserivii pinngitsooratik paasissutissiisariaqartut.

Kalaallit Nunaat naalagaaffeqatigiinnerup iluani immikkut akileraarfiuvoq, Naalakkersuisuusimasullu Danmarkimut peqataarusussimanngillat projekt Money Tranfer-imut. Tassani qallunaat aningaaserivii pisussaatitaapput paasissutissiissallutik aningaasat Danmarkip nunallu aalajangersimasut akornanni nussorneqaraangasa.

-Aningaasarpassuit ukiut tamaasa Danmarkimiit akileraaruserneqaratik annissorneqartarput, Kalaallit Nunaanniit aamma taamaaliortoqartannginneranik isumaqartoqaruni sianiissaqaat. Naalakkersuisuusimasut oqarput qallunaat akileraaruserisui suleqatigilluaqigamikkit immikkut nakkutilliisoqarnissaa pisariaqartinnagu. Maanna paaserusuppara taama suleqatigiinneq naammannersoq. Piffissaq ornipparput nunani allamiut nunatsinni annertuumik sunniuteqarfissaat, taamaattumik nakkutiginninneq tatiginninnermiit pitsaanerutillugu Doris Jakobsen oqarpoq.

Skatteministeri aamma aperivaa, periarfissaqarnersoq Danmarkimiit Kalaallit Nunaat aqqusaarlugu nunanut allanut nuussisoqarsinnaanersoq. Aamma paaserusuppaa Kalaallit Nunaat Savalimmiullu ataatsimiititaliassami ministerip pilersitassaani peqataatinneqassanersut.