Doping pillugu Nuummi Sisimiunilu misissuisut
Antidoping Grønlandimit suli utaqqineqarput doping pillugu misissuinernit 17-usunit misissuinerit inernerisa tusarliunneqarnissaat. Misissuinerit Nuummi Sisimiunilu ingerlanneqarput.
Dopingimik misissuisartut Nuummi Sisimiunilu timigissartarfinnut kalerreeqqaaratik misissuipput. Aamma assammik arsarluni Nuummi pissartanngorniuttoqarnerani misissuisoqarpoq.
- Ileqquuvoq timigissartarfiit ilanngullugit misissuiffigineqartarnerat doping pillugu misissuisoqartillugu. Aamma assammik arsartartut arlallit misissuiffigaavut, timersoqatigiit kattuffianni allattaaneq Claus Nielsen KNRimut taama oqarpoq.
Misissugassanngortitat Norgemi misissueqqissaartarfimmut nassiunneqarput misissuinermiillu maanna qaammatut marlunnguleraluartut suli akissutit takkutinngillat.
- Sikkilerluni sukkaniunnersuaq Giro d'italia ingerlanneqarmat dopingertoqarsimasinnaanera pillugu misissuinerit misissoqqissaarneqarnerat pissutigalugu akissutit nunatsinnut takkunniaasaarput, Claus Nielsen oqarpoq.
Nunatsinni dopingnævnimi siulittaasoq Birgit Niclasen KNRimut oqaluttuarpoq akissutit qaammatit marluk qaangiuppata takkunnissaat naatsorsuutigigitsik.
