Doping pillugu nipaappallaarsorai

-Tupaallannarami nipinnguamilluunniit tusarneq ajoratta, "når taanna timersortartoq eqqussuivoq ajorpoq". Danmarkimi taamaasiortut mattunneqartaraluarput ukiut marluk timersoqqusaanngiivillutik. Tamanut saqqummiullugu, maani susoqanngimmat assut ippinnarami, volleyball-imi nunanut allanut unammisartoq Johan Frederik Zeeb taama oqarpoq.

Nunanut allanut unammisartup qatsunnerarpaa unamminermi peqquserluttoqartarnera isumaqarlunilu kattuffik uani ersarinnerusumik nalunaarsimasariaqaraluartoq.

Timersoqatigiilli kattuffianni isornartorsiuineq pissutissaqannginnerarpaat, erseqqissaatigaallu pisuni arlalinni dopingimik atuineq isornartorsiorneqartareersoq.

Kattuffiup siulittaasua Nuka Kleemann radioaviisimut ilisimatitsivoq kattuffiup inatsisilerituuinit nalilersorneqartoq suliami matumani timersortartut pineqartut marluk timersornermit mattunneqassanersut. Siulittaasup ilimagaa sapaatip akunnerani uani aalajangertoqarumaartoq.

Suliami pineqartumi angutit inuusuttut sisamat hash-imik dopingimullu atortunik eqqussuisimasutut Nunatta Eqqartuussivianit pineqaatissinneqarput. Siulleq pinerluuteqarsimasunut inissiisarfimmiittussanngorlugu. Suliarli Ilulissat Eqqartuussivianit Nunatta Eqqartuussivianut ingerlateqqitassanngortinneqarmat angutit inuusuttut pingasut pineqaatissinneqarnerat allanngortinneqarpoq nalunaaquttap akunneri 240-ut inuiaqatigiinnik kiffartuussisusanngorlugit. Tamanna unnerluussisut tupaallaatigeqaat maannalu utaqqimaarallarpaat eqqartuussissutip oqaasertaasa tigunissaat. Taakku aqagu marlunngornermi saqqummiunneqarnissaat ilimagineqarpoq.