Doping-imik atuisut nunatsinni paasisaasut
Doping-imik atuisut marluk nunatsinni timigissartarfinni paasineqarput doping-imik apriilip aallartilaarnerani misissuisoqarneranut atatillugu
Dopingnævn nalunaarpoq doping-imik atuisut tamarmik nukinik allisitsisartunik anabole steroid-inik taaneqartartunik atuisimasut.
- Doping-ertoqarsimasinnaaneranut inuit 17-it misissuiffigineqarput pissartanngorniunnerni aamma Nuummi timigissartarfinni. Doping-imik atuisutut paasineqartut tamarmik timigissartarfinni sungiusartartuupput, aaqqissuussaasumilli timersornermi malunnartorsisoqarani, Dopingnævnet taama nalunaarpoq.
Nukininnartunik anabole steroid-inik atuisunik aatsaat nunatsinni paasisaasoqanngilaq. Siornatigut marloriarluni paasisaasoqareerpoq. Doping-ertoqarsimasinnaaneranik misissuinermi aamma hash-imi atuisunik naammattoorsisoqarsimavoq taakkulu aamma doping-imut atatinneqartarput.
Dopingnævn-imit erseqqissaatigineqarpoq anabole steroid-inik atuineq ulorianartorujussuusoq. Nukininnartuupput aammali sunniutipiloqarlutik. Anabole steroid-it aammik qaffasitsitsisarput, uummammik allisoortitsisinnaallutik aammalu kolesterol-eqarpallaalersitsisinnaallutik. Ajornerpaaffiani qaratsami taqqanik milittoortitsisinnaapput.
- Anabole steroid-it atuisoq kamaqqajaalersittarpaat, uumilleqqajaatillugu aamma isumaa aalasorujussuanngorsinnaalluni. Ilaatigut aamma tarnikkut ajoquteqalersinnaavoq soorlu aliasorujussualerluni aammalu malersorneqartutut misigilerluni, dopingnævnet taama nalunaarpoq.
Doping-imik atuisutut paasisaasut timigissartarfinni Anti Doping Grønland-imi ilaasortaasuni sungiusaqqusaajunnaartarput sivikinnerpaamik ukiuni marlunni.