DONG nunatta imartaani uuliasiorusuppoq

Danskit nukissiuuteqarnermut suliffeqarfissuat DONG nunatta Kitaata avataani uuliasiornissamut gassimillu ujaasinissamut peqataarusuppoq.

Nutaarsiassaqartitsivik Ritzau naapertorlugu DONG-ip Aatsitassanut Ikummatissanullu Pisortaqarfimmut isumaqatigiinniarnera naammassilersoq aamma DONG-ip uuliamik gassimillu ujaaseqataanissaa ilimanaateqartoq oqaatigineqarpoq.

- Isumaqatigiinniarnerit ingerlalluaqaat, naammassingajalerpavummi. Isumaqatigiinniarnerit teknikkimut tunngasortaat sapaatip akunneri arlaqanngitsut qaangiuppata naammassissavavut, nunarput sinnerlugu isumaqatigiinniartut pisortaat, Jørn Skov Nielsen nittartakkamut business.dk-mut oqarpoq.

DONG-ip saniatigut uuliasiortitseqatigiiffiit Husky Oil, ExxonMobil aamma Chevron ujaasinissamut aammattaaq soqutiginnipput. Kikkut uuliamik gassimillu ujaasinissamut akuerineqarnersut ukiamut septembari aallartilaarpat nalunaarutigineqarnissaa ilimagineqarpoq. Nunatsinni Aatsitassat Ikummatissallu pillugit Siunnersuisoqatigiit Inatsisartunit Folketingimillu ilaasortaaffigineqartoq ataatsimeereerpat.

Canadamiut uuliasiortitseqatigiiffiat Husky Oil aamma NunaOil A/S Qeqertarsuup eqqaani sumiiffinni nr. 5-imi aamma nr. 7-imi uuliamik gassimillu ujaasinissaannut akuersissut, aatsitassarsiornermut naalakkersuisup Kim Kielsenip ualimut atsiorpaa.