DONG II-liornissamik isuma unitsiinnarneqarpoq

Aalajangiiffigisassatut siunnersuut Kalaallit Kunaanni aatsitassarsiornikkut annertuumik sunniuteqarsimasinnaagaluartoq Folketingimi ullumi aalajangiiffigineqarpoq. Konservativet Dansk Folkepartiilu DONG-ip Danmarkimi aatsitassarsiornermik suliaqartuusup aapperneqarnissaanik siunnersuuteqaraluarput.
Allattoq Peter Troelsen, Simon Uldum
apriilip 25-at 2013 10:19

Partiit taakku marluk DONG II-mik, Kalaallit Nunaanni aatsitassarsiorfiusussamik  pilersitsisoqarnissaanik siunnersuuteqaraluarput, ima paasillugu kalaallit aatsitassarsiorneq sapinngisamik annertunerpaamik pissarsiaqaatiginissaannut danskit suliniutigisassaattut.

-DONG II-mik pilersitsisoqarnissaanik isuma uanga orniginartippaallaanngilara. Allatut suleqatigiittoqarnissaa orniginartinneruara, tamannalumi aamma Aleqa Hammondip Helle Thorningillu aamma oqaloqatigiissutigereerpaat. Suleqatigiinnissamut ilusiliassamik nassaassaqqaarpugut, kisianni DONG II-tut iluseqarnavianngilaq, Doris Jakobsen knr.gl-imut oqarpoq.

DONG II-liortoqarnissaa pillugu Folketingimi isumaqatigineqarpallaanngilaq, siunnersuullu amerlanerussuteqarluartunit itigartinneqarluni. Taarsiullugu aalajangiiffigisassatut siunnersuutip immikkoortuata aappaata ingerlateqqinneqarnissaa toqqarneqarpoq, tassalu danskit naalagaaffiata allatut iliornikkut Kalaallit Nunaata aatsitassarsiornikkut sapinngisamik annerpaamik pissariaqartinissaanut suleqataassasoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq