DONG-i pillugu oqallittoqangaatsiassagunarpoq

Danskit uuliasiornermik gassimillu qalluinermik ingerlatseqatigiiffiat DONG Tysklandip avannarpasinnerusortaani inissillugu aamarsuartortumik nukissiorfiliorniarnerat Folketingimi Danmarkimilu naalakkersuisunut saqqummiunneqarpat oqallittoqangaatsiarnissaa ilimagineqarpoq.

Silap pissusaata allanngoriartornera akiorniarlugu Danmarkimi naalakkersuisut iliuuseqarniarput, marloqiusamilli periuseqarnerarneqarputtaaq.

Aamarsuartortuunngitsunik ikummatissaqarnissaq Danmarkimi naalakkersuisut anguniagaraat, Tysklandimili inissillugu DONG-ip aamarsuartortumik nukissiorfiliorniarnera anguniakkanut akerliusoq, partiit illua’tungiliuttut avatangiisit pillugit oqaaseqartuisa oqariartuutigaat.

Naalagaaffik DONG-imik piginneqataavoq, piginneqataassutit 75 procentii naalagaaffimmit pigineqarmata.

Avatangiisinut silallu pissusaanut ministeri Connie Hedegaard DONG-i pillugu misissuiniarpoq, nukissiorfiulli politikkikkut anguniakkat avaqqullugit iliuuseqarsinnaanera aamma oqariartuutigalugu.

Taamatut periuseqarneq Dansk Folkepartiimit tapersersorneqarpoq.

Partii Det Radikale Venstre tamatumunnga isumaqataanngillat. Avatangiisit pillugit oqaaseqartup Johannes Poulsenip tamanna erseqqissarpaa:

- Danmark maligassiuisuusariaqarpoq. Taamaammat aamarsuartortunik nukissiorfiliornissani pisariaqartinngilaa, Johannes Poulsen, Det Radikale Venstrep avatangiisit pillugit oqaaseqartartua oqarpoq.

Partiip Venstrep avatangiisit silallu pissusaanut tunngatillugu oqaaseqartartuata Lars Christian Lilleholtip tamanna illua’tungilerpaa, aamarsuartortumik Tysklandimi nukissiorfiliorniarneq siuariarnertut taallugu.