DONG 2'p kalaallit susaartissinnaavai
- Aamma ima aperisoqarsinnaasoraara, qallunaat suliniutaat taamaattoq sutigut iluaqusiisinnaagami taama allaanerutigisoq imaluunniit aningaasanik amerlanernik pissarsissutaasinaava maanna suliniutaasunut aallartereersunut naleqqiullugu? Tamanna allanngortitsinavianngilaq aningaasanik iluanaarniarnermi imaluunniit qallunaat ilisimariikkaminnik atugassaqartitsileraluarpata imaluunniit taakku marluutillugit atugaaleraluarpata anigaasanik amerlanernik pissarsisoqarsinnaanavianngilaq, Torben M. Andersen oqarpoq.
Qallunaat partiivisa illuatungiliuttut, Dansk Folkepartiip siulittaasua, Kristian Thulesen Dahl siuttuliullugu siunnersuutigaat, Kalaallit Nunaanni aatsitassarsiornermut qallunaat naalagaaffiat aningaasaliisoralugu, ilaatigut soraarnerusutisiaqarnermut aningaasaateqarfiit qallunaallu suliffeqarfissui aningaasaliinerisigut Nunatsinni aatsitassarsiornermut peqataaniarlutik.
Taama aningaasaliinerup kinguneranik annikitsunnguamik iluanaaruteqarnissaq siunnersuuteqartunit iluarineqassanersoq, Torben M. Andersenip qularaa, tassami allanut aningaasaliisoqarpat tamanna pitsaanerussasoq oqaatigalugu.
- Kalaallit Nunaanniit isigalugu apeqqutaalluinnassaaq tamanna allanngortitsisinnaanersoq. Aamma apeqqutaalluinnassaaq kalaallit sulilereernerannut taama iliorniarneq kinguarsaaginnassannginnersoq. Qallunaat peqataanissaminnut qangali piffissaqareeraluarput, taamaaliorsimanngillalli, Aningaasarsiornermut tunngasut pillugit professori aamma Kalaallit Nunaanni Akileraartarnermut Atugarissaarnermullu Isumalioqatigiisitami siulittaasuusoq, Torben M. Andersen oqarpoq.
