USA-mi qinersineq 2016 Donald Trumpip naalagaaffiit nalunartut anginerit ajugaaffigai - Clintonillu mikinerit ajugaaffigalugit
Republikanerit præsidentimut qinigassanngortitaat, Donald Trump, naalagaaffinni pingaarutilinni arlalinni ajugaavoq.
Republikaneri aningaasaatilissuaq Ohiomi, North Carolinami Floridamilu ajugaavoq. CNN aamma NBC taama siulittuipput.
Ohiomiipput præsidentimik taasisussaat 18-it, Donald Trumpilu præsidentinngussaguni tassani ajugaasariaqarpoq.
Floridamiipput præsidentimik taasisussat 29-t. Naalagaaffik USA-p kujataaniittoq naalagaaffiit nalunartunik taagorneqartut anginersaraat.
North Carolinami qinersineq aamma siulittuutigineqartutut pissanganavippoq, Republikanerillu præsidentimut qinigassanngortitaat aamma tassani ajugaasoq, CNN aamma NBC allapput.
Demokraatit qinigassanngortitaat Hillary Clinton naalagaaffinni nalunartuni mikinerusuni arlalinni ajugaavoq.
Hillary Clinton Virgianiami præsidentimik taasisussat 13-it pissarsiarai. NBC taama siulittuivoq.
Virginia naalagaaffittut nalunartutut aamma taaneqarpoq, qinersisartunimmi isumasiuinerit arlallit takutippaat kina ajugaassanersoq nalunartoq.
Demokraatilli præsidentip tullersortissaatut sassartitaat, Tim Kaine, naalagaaffimmi tassani senatoriuvoq, Virginiallu Demokraatinit ajugaaffigineqarnissaa amerlasuut naatsorsuutigisimavaat.
Hillary Clinton aamma Coloradomi ajugaavoq. Naalagaaffiup ilaani præsidentimik taasisussat qulingiluaapput. Nevada nalaagaaffiup ilagaa anginngitsoq, Clinton aamma tassani ajugaavoq.
Naalagaaffinni nalunartuni arlalinni qinersinerup inerneri suli utaqqineqarput aamma qinigassanngortittut imminnut qanittuaraapput.
Republikanerineersorli Donald Trump naalagaaffinni nalunartuni pingaarutilinni Michiganimi Pennsylvania taasinerit kisinneqarnerini siuaqqavoq.
Donald Trump Hillary Clinton nalagaaffiit ilaanni pingaarutilinni arlallit ilimagineqartutut ajugaapput.
Clinton ilaatigut New Yorkimi, siornatigut senatoriffigisamini ajugaavoq. New York Donald Trumpip angerlarsimaffigigaluarpaa naalagaaffiulli ilaa præsidentimut qinersinerni 1976-imiilli Demokraatinit ajugaaffigineqartarpoq.
Donald Trump naalagaaffiiit ilaanni Texasimi, Oklahomami, Kansasimi Arkansasimilu, Republikanerit ileqquussumik ajugaaffigisartagaanni ajugaavoq.
/ritzau/
