Donald Trumpip millionikkaat Nuummi sinniisoqarfimmut immikkortinniarai
Amerikamiut præsidentiata, Donald Trumpip nunatsinnik siorna perusunnerarnera uiverussutaavoq.
Pisinissaminilli akuerineqanngilaq, tamannali pissutigalugu amerikamiut nunatsinni sinniisoqarfeqalerniarnerat taamaatiinnarneqanngilaq.
Trumpip pisortaqarfiata aningaasat qanoq amerlatigisut amerikamiut nunatsinni illoqarfiit pingaarnersaanni, Nuummi sinniisoqarfianut immikkoortinneqarnissaannut siunnersuut USA-mi naalakkersuisunut saqqummiuppaa.
USA-mi naalakkersuisunut siunnersuummi Trumpip 587.000 dollarit – tassa 4 millionit koruunit immikkoortinniarai allassimavoq.
Amerikamiut nutaarsiassaqartitsiviat, Politico taama allaaserisaqarpoq.
AAMMA ATUARUK USA nunatsinni pisortatigoortumik sinniisussarsiortoq
Sinniisoqarfik USA-p nunatsinni sinniisoqarfeqarnerani siulliunavianngilaq.
Tassami USA nunatsinni 1940-mi sinniisoqarfimmik ammaavoq, Danmarki Tysklandimi nazistinit taamanikkut tiguarneqarmat, 1953-imili sinniisoqarfeqarunnaarluni.
USA-p nunatsinni Nuummi sinniisoqarfimmik ammaanissamut pilersaarutai akuerineqarsimasut, nunanut allanut tunngasunut ministereqarfiup decembarimi nalunaarutigaa.
AAMMA ATUARUK Amerikansk konsulat i Nuuk godkendt
Taamaalilluni pilersaarut pisortatigoortumik akuerineqarpoq.
Politicop allaaserisaa naapertorlugu naalakkersuisunut siunnersuut Kongressimi akuerineqarnissaa ilisimanarluinnarpoq. Tamanna nunatta inissisimaffia USA-p pilersaarusiorneranut atatillugu pingaaruteqarneranik pissuteqarpoq.
- Aatsitassat qaqutigoortut sakkutooqarnikkullu periarfissat pissutigalugit Kongressip siunnersuummik akuersinissaa ilimanaateqarpoq. Naalakkersuisuni atorfilik Politicomut oqarpoq.
Amerikamiut nunatsinni sinniisoqarfimmik ammaaqqinnissamut pilersaaruteqarnera siorna aggustimili ilisimaneqalerpoq.
USA-p nunanut allanut tunngasunut ministeriata, Mike Pompeop novembarimi ataatsimeeqatigineqarata kingunerisaanik danskit nunanut allanut tunngasunut ministeriata, Jeppe Kofodip (S) Nuummi amerikamiut sinniisoqarfeqalertussanngussasut aalajangersumik oqaatigaa.
Nutaarsiassaqartitsivik, AP naapertorlugu arfineq marlunnik sulisoqassaaq.
Sinniisoqarfiup 2020-p ingerlanerani ammarneqarnissaa naatsorsuutaasoq siusinnerusukkut oqaatigineqarpoq.
/ritzau/