Donald Trumpip angajulliliaa Københavnimi takuneqartoq
USA-p præsidentiata Donald Trumpip ernera angajulleq, Donald Trump Jr. Københavnimi sisamanngornermi ualikkut takuneqarpoq.
Ekstra Bladet præsidentip ernerata akunnittarfiup Københavnimi Kongens Nytorvimiittup, Hotel d'Angleterrep eqqaani assinganik pissarsisimasoq taama allaaserisaqarpoq.
Assimi Donald Trump Jr. Ekstra Bladetip allaaserisaa naapertorlugu Secret Service-imit inunnit unguneqarsimasoq takuneqarsinnaavoq.
Assit sisamanngornermi nalunaaqutaq pingasunngunngitsiartoq assilisaasut, tusagassiorfik allappoq.
Angalaneranut suna siunertaanersoq aamma Donald Trump Jr. Tallimanngornermi suli Danmarkimiinnersoq ersarissumik allassimanngilaq.
Inoqatinut attaveqaatikkut X-ikkut video Donald Trump Jr.-ip siammarterpaa, tassanilu akunnittarfik Hotel d'Angleterre tunuani takuneqarsinnaavoq. Video sisamanngornermi nalunaaqutaq 15.40 saqqummersinneqarpoq.
Tikeraarnera uitsatigineqartoq
Ministeriuneqarfiup, Nunanut allanut ministereqarfiup imaluunniit Amerikamiut Danmarkimi aallartitaqarfiata Ekstra Bladetip Donald Trump Jr.-ip Københavnimiinneranut pissutaasumik paasiniaalluni saaffiginnissutaa akissuteqarfiginngilaat.
Donald Trump Jr. danskit kunngeqarfiannut aatsaat siullermeerluni tikinngilaq.
Donald Trump Jr.-ip politikkikkut suliniuteqartoq maanna peerussimasoq, Charlie Kirk peqatigalugu Kalaallit Nunaat Donald Trumpip præsidentitut ivertinneqanngilaarnerani – tassa 2025-mi januaarip arfineq-aappaanni – tikeraarpaa.
Tikeraarnera Donald Trumpip USA-p Kalaallit Nunaannik piginnittuulerusunneranik arlaleriarluni oqaaseqareernerata nalaani pimmat uissuummissutigineqarpoq.
Tamatuma saniatigut taassuma tikeraarnera danskit kalaallillu polikeriisa isornartorsiorpaat.
Præsidentip ernerata nammineq podcastiliortarfimmini "Triggered"-imi Kalaallit Nunaannut tikeraarnini pisortatigoortuunngitsoq namminerisamillu angalanerigini oqaatigaa.
- Inunnik naapitserusuppunga, nuna nuannerluinnartoorpasimmat tikillunga ilassilaarlungalu videoliulaarniarluta naatsorsuutigaarput, Donald Trump Jr. podcastimi oqartoq Ekstra Bladet allappoq.
Taassuma Kalaallit Nunaannut sivikitsumik tikeraarnerani assit videoliallu arlallit saqqummiunneqarput.
Video Donald Trump Jr.-ip Magamit teqqianik aappaluttunik (Make America Great Again, aaqq.) Kalaallit nunaanni inunnut agguaassineranik takutitsisoq ilaatigut saqqummiunneqarpoq.
Præsidentip ernera tikeraareerami Kalaallit Nunaannut angalanini nuannerluinnartumik misigisaqarfigalugu tusagassiorfimmit Fox Newsimit apersorneqarnermini oqaatigaa.
