Dollarip nalinga appariartuinnarpoq
Dollari ataaseq 4,69 koruuninik naleqalerpoq, sulilu appariaqqissinnaasoq naalagaaffiit aningaasaataannik misissueqqissaartartoq John Hydeskov Danske Bank-imeersoq Ritzau-imut oqarpoq.
Allattoq Louise M. Kleemann
Qaammatit pingasut tulliuttut ingerlaneranni dollarip nalinga 4,66 koruunimut appariassasoq ilimagineqarpoq.
USA aningaasaqarnikkut ajornartorsiorpoq. Nunat siuttuusut arfineq marluk, G-7-imik taaneqartartut, sapaatip akunnerata naanerani naapeqatigiinneranni dollarip nalingata qaffariarnissaa anguniarlugu akuliunnissamik isuma tapersersorneqanngilaq.
USA-mi aningaasaqarnikkut ajornartorsiorneq 1930-ikkunni aningaasat naleeruttoornerannut assersuunneqarsinnaasoq “Nunat siuarsagassat taarsigassarsiniartarfiannit” nalilerneqarpoq.