DMU-p aaqqissuussaanera allanngorpoq

Danmarkimi avatangiisinik misissuisoqarfik, DMU, ullumikkumit atorunnaarpoq. Ilisimatusarnermik qitiusumik ingerlatsiviup taassuma isumagisaralui Aarhusip universitetiani qitiusumik misissuiffimmi nutaami, taaguutilimmi Det Nationale Center for Miljø og Energimi, isumagineqalissapput.
Allattoq Elisa Isaksen
juulip 01-at 2011 09:44

DMU-p sulisui 500-uusut immikkoortortanut allanut marlunnut nuunneqarput.

Avatangiisinut misissuisoqarfiup, DMU-p, matuneqarnissaanik aalajangiineq ilisimatusarnermik ingerlatsisunit sakkortuumik isornartorsiorneqarpoq. Ilaatigut tamatumunnga pissutaavoq, DMU ilisimatusarfittut tamanit akuerisaammat taaguutaalu tusaamaneqarluarluni. Taamaattumik naalisarlugu taaguutaa DMU, ilisimatusarfinngortumi nutaami National Center for Miljø og Energimi, atuinnarneqassasoq, DMU-mit tusagassiuutinut nalunaarummi oqaatigineqarpoq.

DMU 2007-imili Aarhus Universitetip ataaniilerpoq, taamaattorli avatangiisinik misissuisoqarfiup matuneqarnissaa taamani oqaluuserineqanngikkaluarpoq. Taamatut allangortitsinikkut DMU-p Nunatsinni ilisimatusarnermik ingerlatsinera minnerulersinneqarnavianngitsoq, DMU-mi ilisimatusarnermi pisortanngortup Jesper Madsenip Radioaviisimut siusinnerusukkut oqaatigaa.

DMU-p Issittumi Avatangiisinik misissuisoqarfia Arktisk Miljø, Aarhus Universitetip ataani Institut for Miljøvidenskabip ataaniilissaaq.