DMI RUC-ilu ilisimatusarnialerput

Danmarkimi silasiorfik, DMI, aamma Roskilde Universitetscenter – RUC – silap allanngoriartornera pillugu Kujataanilu innuttaasunut tamatuma sunniutai pillugit ilisimatusarnermik ingerlataqarniartut, Sermitsiaq nittartakkamini allappoq
oktobarip 09-at 2007 06:28

Kujataani sikorsuit DMI-ip 1950-imiilli malinnaaffigiuarsimavai. Sikorsuit qanoq innerinik assaannarmik titartakkat maanna digitalinngortinneqassapput, tamatumalu peqatigisaanik Kujataani innuttaasunik apersuilluni misissuinikkut, ukiuni kingullerni 57-ini pinngortitap allanngorarneranut, innuttaasut qanoq ilillutik naleqqussartarsimanerat paasiniarneqassaaq.

- Allannguutit piniarnermut aalisarnermullu qanoq sunniuteqarsimanersut paaserusupparput, aamma aalisartut piniartullu ukiut ingerlanerini allanngornernut qanoq naleqqussartarsimanersut paasisaqarfigerusupparput, RUC-imi ilinniartitsisoq, lektor Rasmus Ole Rasmussen, Sermitsiamut oqarpoq.

Misissuineq nutaaq ukiup ataatsip missaani, Kalaallit Nunaanni Ilisimatuussutsikkut Kommissionimit tapiiffigineqarluni, ingerlanneqassaaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq