DMI Nuummi Paamiunilu anoraasuarujussuartarnissaanik aarlerisaarisoq

DMI Paamiuni Nuummilu anoraasuarujussuartarnissaanik nunattalu ilarujussuani anorlingaatsiartarnissaanik ippassaq pingasunngornermi ilimasaarivoq.

Danmarkimi silasiorfiup Nuummi immikkoortortaaneersoq Jeanne Mangerel anoraasuarujussuartarnissaa akunnialuit sioqqullugit taama oqarpoq.

- Pueqqoqarfiup killinga kimmut kujatitsinni avataaniippoq, akunnialuilli qaangiuppata sineriammut pissaaq, Paamiullu tikippagit anorsarississaaq, taanna oqarpoq.

Pueqqoqarfik unnugu unnuarulu siaruarluni kitaata ilarujusssuaniilissaaq, taamaaillunilu pueqqoqarfik aamma Kujataanut siaruassalluni, tamaani anorsarinneruleriartussalluni, aputitalimmik masannartuliornertalimmillu qulisimalerluni.

- Ulluni kingullerni qulisimammat anorersuassamaartoq takussinnaavarput - nunattalu ilangaatsiarsuani taamaappoq, Jeanne Mangerel oqarpoq.

Anorersuarnissaa akunnerni qulingiluani ilimasaarutaasoq

Nuummi Paamiunilu unnulernerani arfernup missaaniit unnuaru pingasut missaata tungaanut ima anoraasuartigissaaq, anorersuarujussuartut sakkortutigisumik anoraasuarujussuartarsinnalluni.

Tamannalu Nuummi bussinik angallassinerit kinguaattoornerannik kinguneqaratarsinnaavoq. Bussinilli angallassinernik unitsitsinermik kinguneqarumaarnersoq, Nuup Bussiisa ingerlatsinermut pisortaata Rene Hansenip oqaatigisinnaanngikkallarpaa.

- Isumannaakkunnaartinnagu angallassiunnaarnavianngillat, taanna oqarpoq.

- Bussinik ingerlaartoqarnersoq nittartakkatsinni takuneqarsinnaajuaannarpoq, silarlullu kinguaattortitsisinnaaammat inuit silarlusseruttornerani tassa bussinik ingerlaartoqarnersoq nittartakkatsinni alaatsinaannissaannut kajumissaarpakka, taanna oqarpoq. 

Nuummi anorersuarujusssualeruttornerani anori avammut saqiartuaassaaq, aammali sakkukilliartorluni. Tamanna Sisimiuniit avammut suffarissisarneranik anorsarissisarneranillu kinguneqartussaassasoq, silasiortoq Jeanne Mangerel oqarpoq.

- Unnuaru anorikilliartornissaa ilimasaarutaavoq, tamannalu tassa, ingammik Kujataani, aqagu tallimanngornermi imaliliungaatsiarneranik kinguneqassangatinneqarpoq, taanna aamma oqarpoq.