DKIK naalakkersuisumut isumalluarput

Danmarkimi kalaallit ilinniagaqartut kattuffiata DKIK-p ilinniartitaanermut naalakkersuisunngortoq Doris Jakobsen tikilluaqquaat, ilinniartullu neriupput, naalakkersuisunngoqqammersoq naalakkersuisuusimasumut Henriette Rasmussenimut naleqqiullugu isumaqatigiinniarnissamut piumassuseqarnerussasoq.

- Doris Jakobsenip isummatsinnik tusaaniartarnissaa neriuutigaarput, siulia pissarsiariuminaattarsimammat. DKIK-mi siulittaasoq Parnuna Egede oqarpoq.

DKIK ilinniartunik 300-t 500-llu akornanni ilaasortaqarpoq. Kalaalinngorsaanerunissamik naalakkersuisut siunniussaqarnerminni ilinniagaqartut akornanni oqaatsit qanoq pingaaruteqassusiannik ilinniartut puigueqqusinngillat.

- Kalaallisuinnaanngitsoq aammali oqaatsinik allanik atuisinnaaneq pingaaruteqarpoq, tamanna Danmarkimi takusinnaavarput, ingerlalluarnerusut tassaammata oqaatsinik arlariinnik atuisinnaasut. Parnuna Egede oqarpoq.

DKIK aamma isumaqarpoq, ilinniartut qassit naammassigaangamik nunatsinnut utertarnersut naalakkersuisut misissortariaqaraat, tamanna pillugu paasissutissanik pisortatigoortunik pigisaqartoqanngimmat erseqqissumillu paasineqartariaqalermat.