DKIK allamik atertaassaaq
Kalaallit Danmarkimi ilinniagaqartut peqatigiiffiata DKIK-ip atia allanngortinneqassaaq. DKIK-mi ilaasortaajunnaartarneq akiorniarlugu nutaamik atsiisoqarniarpoq paasisitsiniaallunilu angalasoqassasoq, DKIK-p siulittaasua Parnuuna Egede oqarpoq.
- Ilinniartut DKIK-mi ilaasortaanissartik namminneq aalajangertalermassulli ilaasortaarukkiartorsimavugut., tamannalu pissusissamisuuginnarunaraluartoq, ilaasortanngorumanngittarneq paatsuuinermik asissuinermilluunniit peqquteqartoq pasitsaapparput.
DKIK-mi ilaasortatut 300-it missaat nalunaarsugaapput, qarasaasiakkulli nalunaarsuineq suli nutarterneqarsimanngimmat ilaasortat massakkut qasserpiaanerat nalunartoq Parnuuna Egede oqarpoq.
DKIK 1980-imi peqatigiiffinngorpoq. Ateq DKIK nunatsinni KIK-mut assiguvallaaqimmat, KIK-milu ilaasortaasimasut DKIK-mut ilanngukkaangamik KIK-ip isummertariaasia nassartarmassuk, KIK-millu sivisuumik suleqateqarsimannginnini pissutigalugu DKIK-p atia allanngortinneqarniartoq Parnuuna Egede erseqqissaavoq.
DKIK kalaallit Danmarkimi ilinniagaqartut naapittarfiattut isummersoqatigiittarfiattullu atorneqartoq Parnuuna Egede oqarpoq.
DKIK qaammammi matumani ataatsimeersuarnerani atissarsiuinermi aqqit pingasut toqqagassatut aalajangerneqartut tassaapput GSD, Ilikka imaluunniit Avalak.
