DK-imi ilinniagaqartut tapiiffigineqarsinnaanissaat misissorneqarpoq

Allattoq Jaaku Lyberth
juunip 12-at 2007 06:14

Kalaallit Danmarkimi ilinniagaqartut 25-it sinnerlugit ukiullit angalanerminnut tapiissutisisarnissaannut periarfissaat maanna Angallanneq pillugu ministerip Flemming Hansenip misissorpaa.

Kalaallit Danmarkimi ilinniartut 25-it sinnerlugit ukiullit angalanerminnut ullumikkut tapiissutisisinnaanngillat, tapiissutisinissamut Naalagaaffiup ilinniagaqarnersiutaannik SU-mik taaneqartartumik pisartagaqarnissaq piumasaqaataammat.

- Ajornartorsiummut ilisimatinneqarpunga. Angalanerminnut tapisiaqartitsinermut ilinniartut Kalaallit Nunaanneersut 26-ileereersimasut SU-mik pisartagaqanngitsut ilaatinneqannginnerannut ilisimatinneqarpunga. – Atorfilittamma maanna ilinniartut tapisiaqalernissaat pillugu misissuipput, Angalanermut ministeri Flemming Hansen raadiuaviisimut taama oqarpoq.

Danmark-imi inuusuttut 26–it inorlugit ukiullit angalanerminnut tapiissutisisarput.