DJØF: Sulinissatsinnut periarfissitsigut
Politikerit tamat tusaasassaannik atorfilinnut saassussisaqattaarnerat, DJØF-ip Nunatsinni siulittaasuata, Sebastian Bach Hansenip, kanngunarnerapaa:
- Atorfilittat soorunami politikkertussaanngillat. Suliat sapinngisamik ilisimasaqarneq tunngavissaqarluarnerlu aallaavigalugit suliarineqasssapput. Aammalumi ilaasortavut taama sulisarput, Sebastian Bach Hansen oqarpoq.
Taanna ullut qulit ingerlanerinnaanni aappasaa ilaasortaminik illersuilluni tusagassiuutitigut saqqummerpoq.
Siullermik pivoq, Namminersorlutik Oqartusani atorfilittat Finn Karlsenip paasissutissanik pingaarutilinnik isertuussisimanerarmagit.
Maannakkullu taamaaliorpoq, Qaasuitsup Kommuniani kommunalbestyrelsimi ilaasortap Ane Lone Baggerip kommunip atorfilittai politikkernerarlugit isornartorsiormagit.
Uanilu apeqqutaanngilaq, Demokraatit Qaasuitsup Kommuniani illua tungiliuttutut inissisimammata:
- Aap, partiit allat aqutsisuummata illuatungiliuttut soorunami ilungersornerupput. Kisianni taanna allaanerunngilaq. Aamma taakkua isornartorsiutitik kommunip iluani aaqqissinnaasariaqarpaat, atorfilittat siulittaasuat oqarpoq.
Borgmester Jess Svane nalunaarnikuuvoq, politikerinut aalajangigassanngorlugu inassutini titarnertaat isornartorsiorneqartut, maanna peerneqarsimalersut.
- Borgmesterip atorfilittami sulianut ilumoorfiginninnginnera ingasalluinnarpoq. Suliamut pikkorliorneruvoq akuusullu tamarmik eqqarsaqqittariaqarput, atorfilittat siulittaasuat oqarpoq.
Politikerit naammagittaalliutissaqarunik, pisortat aqutsiviini tamani aqqutissaareersut atortassagaat, Sebastian Bach Hansen kaammattuivoq.
- Uani pineqartumi naammagittaalliortoq borgmesteriliarsimasinnaagaluarpoq kommunaldirektøriluunniit ornillugu, inatsisilerituut aningaasarsiornermillu ilinniagartuut peqatigiiffiata, DJØF-ip, Nunatsinni immikkoortortaani siulittaasoq, Sebastian Bach Hansen oqarpoq.
