Ditte Sorknæs: Skandinaviamiut puisit amiinik utaqqiinnarput
Great Greenland A/S-ip nunani avannarlerni puisit amiinik tunisani amerlanerulersittariaqarpai. Ingerlatseqatigiiffiup pisortartaava Københavnimi ukiumoortumik atisanik saqqummersitsinersuarmi Great Greenlandip ippassaq pingasunngornermi atisanik takutitsinerani peqataasoq taama oqarpoq.
Lars Bergip februaarip aallaqqaataani pisortaajunnaarnerata kingorna pisortanngortup Ditte H. Sorknæsip erseqqissaatigaa ingerlatseqatigiiffiup Skandinavia niuerfittut atorluarsimanngikkaa.
- Pingaartumik nunani avannarlerni tuniniaanerusariaqarpugut. Maannakkorpiarmi tunisavut naammaginanngilluinnarput. Tuniniaasartut eqqortut nassaariniartariaqarpagut, taakkulu sapinngisamik sukkanerpaamik tunisaqarnissarput isumagissavaat, KNR-imut taama oqarpoq.
Puisit amii nunani avannarlerni soqutigineqartut
Skandinaviami atuisartut puisit amiinik soqutigisaqartuupput, Ditte H. Sorknæs isumaqarpoq.
- Nunat eqqaamiorisavut aallartitsissutigisariaqarsoriivippakka. Skandinavia aallartiffigissavarput, Skandiaviamimi puisit amii pillugit paasinninneq soqutiginninnerlu annertuupilussuuvoq. Aamma niuerfinni taakkunani nioqqutissanik pitsaasunik utaqqiinnartoqartoqartoq isumaqarpunga.
Namminersorlutik Oqartussat Great Greenland A/S-ip ingerlaaannarnissaa qulakkeerniarlugu 2009-imiilli ukiut tamaasa immikkut ittumik aningaasaliisariaqartarsimapput. Ingerlatseqatigiiffik 2015-imi 15 millionit koruuninik aningaasaliiffigineqarpoq. Tamatullu inissisimasoqarnera Ditte H. Sorknæsip mumisinniartussanngorpaa.
Puisit amiinik toqqortaatigineqartut amerlasuupilussuit
Tunisat pilertortumik amerleriarsinnaanngippata Great Greenland A/S-ip puisit amiinik pisiarpassuit Europami niuerfinni tunisinnaanngisani kasiilertariaqassavai.
- Puisit pisiarineqarnerinit Københavnimi akitsorterussisarfimmut apuunneqarnissaannut aningaasarpassuit atorneqartarput. Ammerivimmi suliarineqarneri assartorneqarnerilu akisuupilussuuvoq.
- Natsiit amiinik uninngasuutivut maannakkorpiaq amerlasuupilussuupput, akitsorterussisarfimmilu natsiit amiinik amerlanerusunik tunisaqarsinnaanngikkutta kasiilertariaqassavagut, Ditte H. Sorknæs KNR-imut taama oqarpoq.
