Disneyp nunatsinni filmiliuleruni qimmissai akuerineqarput
Filmiliortartup amerikamiup Walt Disneyp nunatsinni filmiliornissaanut atatillugu qimminik sungiusakkanik
Kangerlussuarmut Ilulissanullu eqqussisinnaanissaa ippassaq naalakkersuisunit akuerineqarpoq.
Antarctica, Disneyp Kangerlussuarmi Ilulissanilu apriilip qaammataani filmiliariniagaa taama qulequtaqartinneqarpoq. Filmiliornermi pisimasut piviusut tunngavigineqassapput; Ilisimatooq sikuiuitsoq kujallermi ajutoormat timmisartumik aaneqarpoq.
Qimmiisa sermip quppaani ajutoorluni annerfianit annaappaat, timmisartumilu qimmit inissaqanngimmata qimaannarneqarlutik. Ilisimatooq iluarsigami qimmiminik aallerpoq, qimmimilu takoqqinnissaasa tungaanut ilungersunartorpassuit annernartorpassuillu atorpai.
Pinngortitami filmiliorneq annerusumik ingerlanneqassaaq. Taamaammat qimminik immikkut sungiusakkanik nunatsinnut eqqussinissamik akuersissummik pinissaq pisariaqarsimavoq.
Naalakkersuisut piumasarisimavaat immiussinnginnerup nalaani qimmit
inaanniitinneqassasut nakkutigineqarluassasullu, aamma qimuttunut attaveqartinnaveersaarneqassasut. Qimmit sungiusakkat perlerornermut qimmillu nappaatigisinnaasaannut akiuussutissamik kapineqassapput.
filmiliornermi pisariaqarsimavoq qimmit sungiusarluarsimasut isikkumikkullu takutitsisinnaasut atorneqarnissaat.
Ukioq kingulleq Disney filmiliornissamut piareersaateqariartorluni nunatsinniippoq, ukioq mannalu immiusussaangaluarpoq aappaagumullu kinguartinneqarluni.
