Disko Line: Maliina Ittuk Kalaallit Nunaanni angallassiunnaassaaq

Maliina Ittuk Kujataani angallassiunnaassaaq.

Tamanna Disko Linep tusagassiuutinut nalunaarutaani ilisimatitsissutigineqarpoq.

Mittarfiulli ammarneqarnissaata tungaanut suli angalassaaq.

Michael Sloth Højgaard, Disko Linemi pisortaasoq, aalajangerneq tamanna ajornaatsuinnaanngitsoq allappoq.

- Maliina Ittup Kalaallit Nunaanni ilaasunik angallassisarnissaanut anguniagaqarluarnikuugatta tamanna uagutsinnut kinguariarneruvoq, pisortaq allappoq.

Atorunnaarsitsinerli ilaasut ikinnerinik pissuteqaannanngilaq.

Umiarsualivinni atugassarititaasut pitsaanngitsut

Qaqortup mittarfia ammarneqarpat Disko Linep Maliina Ittuk Qeqertarsuup Tunuani angallassissutigiumaarlugu neriuutigalugu, pisortaaneq KNR-imut 2024-mi decembarimi oqarpoq.

Maliina Ittuk umiarsuaavoq innaallagiaq dieselilu atorlugit angalasinnaasoq.

Tamanna umiarsuarmik atulersitsinissap kinguaattoorneranik kinguneqarpoq.

Michael Sloth Højgaardip Maliina Ittuup atorunnaarsinneqarluinnarneranut suna pissutaanersoq tusagassiuutinut nalunaarummi oqaatiginngilaa.

Umiarsualivinnili atugassarititaasut naammaginannginnerarpai.

- Teknikikkut ingerlatsinikkullu periarfissat suut tamaasa misissuiffigaagut, inuttagullu immikkut ittumik iliuuseqarsimapput. Umiarsualivinnili atugassarititaasut qulakkeerneqarsinnaanngippata, isumannaallisaaneq ingerlatsinermilu akisussaaffik aallaavigalugit iliuuseqartariaqarpugut.

Maliina Ittuk Kalaallit Nunaanni siunissami umiartornavianngitsoq, tusagassiuutinut nalunaarummi ilisimatitsissutigineqarpoq.

- Maliina Ittuk Kalaallit Nunaanni umiartornavianngilaq. Umiarsuaq qanoq pineqassanersoq suli paasinarsinngilaq, tusagassiuutinut nalunaarummi allassimavoq.