Coronavirus nunatsinni siaruatsaaliorniarlugu angallassiunnaarallartussanngortoqarpoq.Assi: Disko Line

Disko Line Arctic Umiaq Linelu angallassiunnaarallartussanngortut

Disko Line aqqutigalugu marsip ulluisa 21-ata apriilillu ulluisa sisamaata akornanni angalasussaasimagaluanut akitsuutitaqanngitsunik taamaatitsiinnartoqarsinnaavoq. Sarfaq Ittumillu angalanissamut bilitsisisimasut akiliutitik tigoqqissinnaavaat.

Disko Linep arfininngorneq marsip ulluisa 21-aniit apriilip ulluisa sisamaata tungaanut angallassiunnaarallartussanngorpoq.

Disko Linep pisortaa Noëlle Simoud tusagassiutinut taama nalunaaruteqarpoq.

Disko Line taamaalilluni, Air Greenland nunatsinnut nunatsinniillu tallimanngorpat unnuap qeqqaniit ulluni 14-ini tulliuttuni timmisartuussisarunnaarallartussaq assigalugu, angallassisarunnaarallartussanngorpoq.

AAMMA ATUARUK Ministeriuneq nunatsinnut: Iluaqutaasinnaasut tamaasa atulersigit

Nunatsinni illoqarfiit nunaqarfiillu akornanni timmisartuussinerit aamma unitsinneqarallassapput.

Coronavirus nunatsinni siaruatsaaliorniarlugu angallassiunnaarallartussanngortoqarpoq. 

Marsip ulluisa 21-ata apriilillu ulluisa sisamaata akornanni angalasussaasimagaluanut akitsuutitaqanngitsunik taamaatitsiinnartoqarsinnaavoq, angallassinissarluunniit aallarteqqeriarpat apriilip ulluisa sisamaata kingorna angalanissamut nuunneqarsinnaallutik.

Angalanissaminnik taamaatitsiinnarusuttut allannguerusuttulluunniit tamarmik emailikkut saaffiginninnissaat kajumissaarutigineqarpoq, tamanna info@diskoline.gl-imut allannikkut pissaaq, angalasussap aqqa, inniminniinermut normu angalanissarlu taamaatiinnarusunnerlugu kinguartilluguluunniit tassani allanneqassallutik.

Arctic Umiaq Line aamma kinguartitsisoq

Sarfaq Ittuup angalanerata aallartinnissaa apriilip ulluisa pingajuannut kinguartinneqarpoq, oqartussammi nunatta iluani angallassinerup tallimanngornermiit, ulluni tulliuttuni 14-ini matuneqarallarnissaanik aalajangernerisa kingunerisaanik tamanna aalajangerneqarpoq.

Taamaalilluni Sarfaq Ittuup pilersaarutit malillugit marsip ulluisa 27-anni Nuummiit aallarnissaa apriilip pingajuanut kinguartinneqarallarpoq.

Sullitavut marsip ulluisa 27-annit apriilip aappaata tungaanut bilitsisisimasut, Arctic Umiaq Linemut info@aul.gl-imut attaveqaqquneqarput.

Tunillaassortunik nappaalasoqarneranut ataatsimiititaliarsuup innersuussutai makkuupput:

  • aaqqissuussat inunnit 100-nit amerlanerusunit peqataaffigineqartussat nangaasaarutigineqarluinnarput.
  • nunatsinniit nunatsinnullu sapinngisamik angalasoqassanngilaq. Tamanna nunatsinni angalanermut atuuppoq. 
  • illoqarfinni bussit ilaasunik ulikkaaveqqusaanngillat.
  • timersortarfiit, naluttarfiit sutorniartarfiillu isersimasorisinnaasatik affaannaat isersimatittassavaat. 
  • inuit nunami aarlerinaatilimmeereerlutik nunatsinnut utertut tikinnerminniit ulluni 14-ini tulliuttuni angerlarsimaannaqquneqarput.
  • inuit nunami aarlerinaatilimmeereerlutik nunatsinnut utertut napparsimmavinnut, utoqqaat illuinut illuutinullu allanut aarlerinaateqarfiulersinnaasunut ornigutissanngitsut.

Isummersuutit