Arctic Umiaq Linep ilaasortaat Disko II svenskit/norskit angalatitseqatigiiffiannut tunisimavaat.
Siulersuisut siulittaasuat Vagn Andersen ullaatungaa taama oqaluttuarpoq.
Umiarsuaq 22,5 millioni koruunilersillugu tunineqarpoq siulittaasullu akigitinneqartoq naammagisimaarpaa. Oqaatigaa akikinnerpaaffissatut eqqarsaatigisaminnit qaffasinnerusumik akilersinneqartoq.
Disko II-p tuninerata saniatigut Arctic Umiaq Linep illut arlallit Nuummiittut tunisimavai.
Sapaatip-akunnerata ingerlanerani illut 9 millioni koruunit missaannik nalillit namminersortunut tunineqarsimapput.
Maanna allaffeqarfiup Nuummi umiarsualivimmiittup tunineqarnissaa kiserngoruppoq.
Vagn Andersenip piffissami matumani Royal Arctic Linep aamma Air Greenlandip siulersuisuisa ilaasunik angallassilerusullutik nalunaaruteqarnissaat utaqqivaa.
Taanna isumaqarpoq suliffeqarfiit taakkua Arctic Umiaq Linep ingerlateqqinnissaanut piukkunnarluartuusut.
- Ilaasunik immakkut angallassineq aalajaatsuusariaqarpoq, isumaqarpungalu suliffeqarfiit taakkua marluullutik tamanna qulakkeersinnaassagaat, Vagn Andersen oqarpoq.
