Disko II-mik pisisussat soqutiginnikkunnaarput

Arctic Umiaq Line-p ilaasortaatigisaa Disko II svenskit angalatitseqatigiiffiannut Polar Quest-imut tunineqartussanngoraluarpoq.

Taakkuli umiarsuarmik pisiumajunnaarlutik nalunaarsimapput.

Arctic Umiaq Line-p pisortaa Jens Hesseldahl aperaarput sooq taakku pisiumajunnaarnersut.

- Apeqqut akiuminaappoq, tassami pisisussat isumaqatigiissuteqarfigereeraluarpavut. Taakku siulersuisui uagullu siulersuisugut atsioqatigiinnissaat tullinnguukkaluarparput. Atsioqatigiinnerlu pisussanngungajalersorlu pisiumajunnaarlutik nalunaarput, Arctic Umiaq Line-p pisortaa Jens Hesseldahl oqarpoq.

Taanna erseqqissaavoq, Polar Quest pisiumajunnaarnertik pillugu iluamik nassuiaasimanngitsut oqaatigiinnarsimagaalli siulersuisuisa Disko II pisiariumasimanngikkaat.

Jens Hesseldahlu aperaarput Disko II massakkut qanoq iliorneqassanersoq.

- Umiarsuaq suli tuniniakkatut nittarsaapparput, soqutiginnittussarsiussavarpullu, aammalumi soqutiginnittunik tutsiuttoqareerpoq.

Arctic Umiaq Linep pisortaa Jens Hesseldahl taama oqarpoq.

Taassuma eqqumiitsortaqarsoraa svenskit angalatitseqatigiiffiat Polar Quest pisinissaminut soqutiginneriarluni soqutiginnikkunnaariataarnera.