Discovery aallartinniarpaat
USA-p avataarsualiartaataa Discovery, arfineq-marlunnik issimasulik, ualeru tallimanut tanneq arfineq-pingasunngulerpat aallartinneqassaaq.
Discovery arfininngormalli aallartinneqartussaasimagaluarpoq, silalli ajornera pissutigalugu aallartinneqarsinnaasimanani.
Ajornartorsiutilli tamaanga naanngillat. Discovery-p avataarsuaneereertilluni nunarsuatsinnut uteraangami qaleruaa ikuallalersoornaveeqqutaasartoq quppaqartoq paasineqarsimavoq, Discovery-llu aallartinneqarnissaa aammaarluni kinguartinneqarluni.
Amerikamiut avataarsualiartitsisarfiat NASA ikuallalersoornaveeqqut pitsanngorsarusullugu 1 milliard dollarsinik, tassa danskit aningaasaat 6 milliard koruunit missaanniittut atorsimavaat.
Avataarsualiartaat alla Columbia 2003-mi nunarsuatsinnut uteriartortilluni ikuallalerpoq, issimasuilu tamarmik ajunaarlutik.
Taamaakkaluartoq NASA-p Discovery-p aallartinneqarnissaa kinguarteqqikkusunngilaa, ullumilu tassa tallimanut tanneq arfineq-pingasunngulerpat avataarsualiartinneqassaaq.