. Assi: Mads Claus Rasmussen/Ritzau Scanpix

Diplomati qaffakkiartuaartoq Issittumi ataqatigiissaarisussatut USAp toqqarpaa

Issittumi ataqatigiissaarisutut atorfik ukiuni sisamani inuttaqanngereersoq, James DeHart USAp atorfinitsippaa.

Amerikamiut nunanut allanut naalakkersuisoqarfiata atorfilittat qaffasissumik inissisimasut ilaat, immikkut Issittumi pissutsinik sammisaqartussatut toqqarpaat. 

Trumpip allaffeqarfiata sapaatip akunnerani kingullermi nalunaarutigaa, James DeHart Issittumi pissutsinik ataqatigiissaarisussatut atorfinitsinneqartoq.

Naalakkersuisoqarfik taamatut tusagassiuutitigut nalunaarummini nalunaarpoq.

Tusagassiuuteqarfik Arctic Today naapertorlugu, USA aatsaat Issittumi ataqatigiissaarisumik atorfinitsitsilinngilaq.

2014imiit ukiuni pingasuni admiraliusimasoq Robert Papp tassunga assigusumik atorfeqarpoq, Trumpili præsidentinngormat atorfik inuttaleqqinneqarnikuunani. 

Tamannali maanna allanngortinneqarpoq.

- Nunarsuatsinni inuiaqatigiit akorngini Issittumi pissutsit pillugit USA siuttutut inissisimavoq kiisalu Issittumi eqqissisimasoqarnissaata qulakkeerneqarnissaanut akisussaassuseqarluni, tamaanilu amerikamiut soqutigisaat qulakkeerlugit amerikap nunataa illersortussaallugu, Issittumilu naalagaaffiit unammilligassatik pillugit suleqatigiinnissaat anguniartussaallugu, nunanut allanut naalakkersuisoqarfik allappoq.

Ukiorpassuarni diplomatitut misilittagalik

DeHart ukiorpassuuarni diplomatitut atorfeqarnermini nunanut allanut tunngasunik suliaqartarnikuuvoq. Diplomatitut qaffakkiartuaartoq DeHart, nunarsuatsinni tamani isumannaallisaanissaq anguniarlugu isumaqatigiissuteqartarnernik suliaqartarluni siunnersuisutut kingullermik atorfeqarpoq.

Tamatuma siorna - Arctic Today naapertorlugu – 2015imiit 2018imut Afghanistanimi amerikamiut anguniagaat pillgu siuttumut ikiortaanikuuvoq. Tamatumalu siorna aamma Norgemi diplomatitut atorfeqarnikuulluni.

Issittumi – Kalaallit Nunaannilu – pissutsit ataatsimut isigalugit USAp eqqumanialertornerani nutaamik atorfinitsitsisoqarpoq.

USAp Nuummi aallartitaqarfini qaammat kingulleq ammaqqippaa. Donald Trumpip tupaallaatigineqaqisumik Kalaallit Nunaat pisiariniarlugu neqerooruteqarneranit ukioq ataaseq qaangiuttorlu atorfinitsitsisoqarpoq. Tamannali ingerlaannartumik itigartinneqarpoq. 

Sapaatip akunneri marlussuit matuma siorna amerikamiut nunanut allanut naalakkersuisuat, Mike Pompeop, aamma Danmarkimut tikeraarpoq, taamanilu nunanut allanut naalakkersuisoq Jeppe Kofod (S) kiisalu Kalaallit Nunaanni nunanut allanut naalakkersuisoq, Steen Lynge (D) ataatsimeeqatigalugit.

Taamani aamma taassuma arlaleriarluni erseqqissarpaa, Issittoq USAmut pingaaruteqartoq.

Ungasissorsuunngitsukkut aamma Donald Trumpip oqaatigaa, umiarsuarnik sikusiutinik oqimaatsunik USA sanaartotitisariaqartoq. Amerika mi tusagassiuuteeqarfik The Guardian naapertorlugu, Issittumi tamani USAp tamatumuuna najuussinnaalernissaa anguniarneqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat