Dinosaurit nunatsinni?
Uumasorujussuarnik dinosaurinik ilisimatuut assorsuaq Tunup avannaani misissueqqissaarnissartik pilerigaat, uumasorujussuit paarmortut ilaagisimasaata svaneøglep saarni ujarannguunnikut nassaarineqareersullu.
– Kalaallit Nunaata avannaarpiarsuani svaneøgleqarsimaneranik takussutissaqarpoq, tamaammat allanik aamma peqqissaarluta misissuigutta nassaarsinnaanissarput ilimanarluinnarpoq. Jesper Milán, Københavnip Universitetiani uumasunik qangarnisarsiooq aviisimut Politikenimut oqarpoq.
Uumasut ujarannguunnikut nunatsinni nassaat ukiut 145 millionit matuma siornagut tassaarnersuaqarneragut Kalaallit Nunaannut pisimassangatinneqarput, taamanimi avataarsuanit ujarak Barentip imartaanut nakkartoq malerujussuarnik pilersitsisimasoq paasineqarsimavoq. Ujaqqap ullorissap anaanik aamma taaneqarsinnaasup misissornerani nunatsinni uumasorujussuit ilanit ujarannguunnikumik nassaartoqarsimavoq.
Uumasorujussuaq paarmortoq marrarmit qalleriartorneqarsimavoq ukiorpassuillu ingerlanerini ujarannguukkiartulersimalluni.
