DIH: Kuupik erseqqissaasariaqarputit

Dronning Ingridip Napparsimmavissuani sulisut ullaaq nalunaaqutaq quligiluanut katersuupput ataatsimeersuarlutik. Ataatsimiinnermi peqataasut, Peqqissaavimmi Aqutsisut Kalaallit Nunaanni Peqqissaavinni Qullersaallutik ingerlatsinermut aqutsisut akuersaarneqarsinnaanngitsumik iliuuseqarnerat tupigusuutigisorujussuuaat, taama tusagassiutinut nalunaarummi ilaatigut allapput, Dronning Indridip Napparsimmavissuani sulisut.
Allattoq Apollo Jeremiassen
apriilip 10-at 2012 13:36

Peqqissaavinnik Aqutsisut, Peqqissutsimut Naalakkersuisoqarfimmit annertuumik akuliuffigineqartumik, suliunnaarsinneqarput suliffimminnillu qimagutitinneqarput. Taamaaliortoqarneranilu Naalakkersuisoqarfik nammineq suliassaqarfimmini pisunik misissuinermik aallartitsivoq.

Naalakkersuisoqarfik suliami nammineq akuliusimalluinnarfimmini imminut misissortussanngorluni, sulisut allapput.

Naalakkersuisoqarfimmi suliami pineqartumi akisussaasuusumit, tassa Naalakkersuisoqarfimmi Pisortamit nassuiaateqartoqarsimanngilaq, soorluttaaq Peqqissutsimut Naalakkersuisoq suliami qisuariarsimanngitsoq.

Dronning Ingridip Napparsimavissuani sulisut akisussaassuseqanngitsumik iliuuseqartoqarnera sakkortuumik uparuarniarpaat, Peqqissaaveqarfimmilu Qullersaallutik Aqutsisut suliaannik ataqqinninnginnertut nalilerlugu, taamaammallu suliaq pillugu avataanit  misissuisoqarnissaa piumasaralugu, taamatuttaaq Naalakkersuisut Siulittaasuat, Kuupik Kleist, sulisut kaammattorniarpaat suliami pisut pillugit ersarissaaqqullugu taamaaliornikkut Kalaallit Nunaanni Peqqissaaveqarfinni suliffeqarfinni toqqissilluni sulineq ingerlaqqissinnaaqqullugu. Dronning Ingrid Napparsimmavissuani sulisut taama tusagassiutinut nalunaarput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq